ہریانہ: پارک کا افتتاح رکن اسمبلی کو کرنا تھا، لیکن یہ کام کسانوں نے انجام دے دیا!

حصار: تین مرکزی زرعی قوانین کے خلاف کسانوں کی جاری تحریک کے درمیان کسانوں نے آج ہریانہ میں حکمراں بھارتیہ جنتا پارٹی اورجن نائک جنتا پارٹی کے عوامی نمائندوں کے رنگ میں بھنگ ڈال دیا۔ دراصل بی جے پی اور جے جے پی لیڈران ہانسی میں ایک پارک کا افتتاح کرنا تھا، لیکن اس کام کو کسانوں نے اتوار کی شب ہی انجام دے دیا۔

آج ایم ایل اے ونود بھیانا کو امرا روڈ پر واقع لالہ حکم چند پارک واقع نوتعمیر پارک کا افتتاح کرنے کے لئے پہنچنا تھا۔ کسان یونین کے ضلع صدر کلدیپ کھرڈ کی قیادت میں کئی کسان کل شب ہی پارک میں پہنچ گئے۔ انہوں نے افتتاحی پتھر کے پاس جھنڈے لگادیے۔ بعد میں کھرڈ نے کہا کہ پارک کا افتتاح انہوں نے مہنت اِچھاپوری سے ربن کٹوا کر کروا دیا اور پتھر پر کسان تحریک کے جھنڈے لگادیے ہیں۔ اس دوران کسان لیڈران نے کہا کہ سنیوکت مورچہ کی اپیل پرجہاں پر بھی بی جے پی- جے جے پی کے لیڈران کاکوئی سرکاری پروگرام ہوگا، تووہاں اس کی مخالفت کی جائے گی۔