کالج کا نہیں، بدلنا ہے تو اپنا نام بد لو: ہرسمرت کور

دہلی کے دیال سنگھ ایوننگ کالج کا نام تبدیل کرنے پر این ڈی اے میں پھوٹ پڑ گئی ہے۔ مرکزی وزیر ہر سمرت کور نے انتباہ کرتے ہوئے کہا ہے کہ جو شخص کالج کا نام تبدیل کرنے کا خواہش مند ہے اس کا خود کا نام تبدیل کیا جانا چاہئے۔ انہوں نے کہا ’’ یہ نا قابل قبول اور چونکانے والا اقدام ہے کیوں کہ پاکستان میں ان کے تعاون کے لئے سردار دیال سنگھ کالجوں کو چلایا جا رہا ہے ۔

اکالی دل کی رکن پارلیمنٹ اور مرکزی وزیر ہر سمرت کور کا یہ بیان ایسے وقت میں آیا ہے جب 17 نومبر کو دیال سنگھ ایوننگ کالج کی گورننگ باڈی (جی بی )نے اہم فیصلہ لیتے ہوئے کالج کا نام تبدیل کرنے کا فیصلہ لیا تھا۔ تجویز میں کالج کا نام ’وندے ماترم مہاودیالیہ‘ کرنے کا مطالبہ کیا گیا ہے۔

گورننگ باڈی کے چیئر مین امیتابھ سنہا نے کہا ’’اس کے بعد ایوننگ اور مارننگ کالجوں کے الگ الگ نام ہوں گے۔ سال 1958 سے ہی دیال سنگھ مارننگ اور ایوننگ کالجوں کا اپنا وجود رہا ہے۔ اس لئے ہمیں ایوننگ کالج کا نام تبدیل کرنا ہوگا۔ ‘‘

واضح رہے کہ دیال سنگھ کالج دہلی یونیورسٹی کا پہلا ایوننگ کالج ہے۔ نام تبدیل کرنے کے حوالے سے بی جے پی کے ایک رہنما اور ایک وکیل نے کہا ہے کہ ہم نام تبدیل کرکے ’ماں کا احترام ‘کر رہے ہیں۔