کھلاڑیوں کی ہراسانی کا معاملہ: مانیٹرنگ کمیٹی کی تشکیل تک ریسلنگ فیڈریشن کا کام کاج معطل

نئی دہلی: کھیل کود کی مرکزی وزارت نے ریسلنگ فیڈریشن آف انڈیا (ڈبلیو ایف آئی) کے کام کاج کو اس وقت تک معطل کر دیا ہے جب تک اس پر لگائے گئے الزامات کی جانچ کے لیے ایک مانیٹرنگ کمیٹی تشکیل نہیں دی جاتی۔

ہفتہ کی دیر رات جاری ایک ریلیز میں یہ اطلاع دیتے ہوئے وزارت نے کہا ’’وزارت کھیل نے ریسلنگ فیڈریشن آف انڈیا کو مطلع کر دیا ہے۔ فیڈریشن کے خلاف کھلاڑیوں کی طرف سے لگائے گئے مختلف الزامات کی تحقیقات کرنے کے لئے ایک مانیٹرنگ کمیٹی مقرر کرنے کے حکومت کے فیصلے کے پیش نظر ڈبلیو ایف آئی کی تمام جاری سرگرمیاں فوری طور پر معطل کر دی گئی ہیں۔‘‘

وزارت نے اپنے بیان میں کہا کہ مانیٹرنگ کمیٹی تشکیل ہونے اور ڈبلیو ایف آئی کی ذمہ داریاں سنبھالنے تک فیڈریشن کا کام کاج معطل رہے گا۔

وزارت کھیل کی طرف سے تمام سرگرمیوں کو فوری طور پر معطل کرنے کی ہدایت کے پیش نظر ڈبلیو ایف آئی کو اتر پردیش کے سے گونڈا میں جاری رینکنگ ٹورنامنٹ کو منسوخ کرنے کے لیے کہا گیا ہے، وزارت نے ریسلنگ فیڈریشن کو ہدایت دی ہے کہ وہ شرکاء سے وصول کی گئی انٹری فیس واپس کرے۔

واضح رہے کہ ورلڈ چیمپئن شپ میڈلسٹ ونیش پھوگاٹ، ساکشی ملک اور بجرنگ پونیا سمیت کئی معزز پہلوان ریسلنگ فیڈریشن کے خلاف بدھ سے جمعہ کی رات دیر گئے تک احتجاج پر بیٹھے تھے۔ ریسلرز نے فیڈریشن کے چیئرمین برج بھوشن شرن سنگھ پر خواتین ریسلرز کے ساتھ جنسی زیادتی اور جان سے مارنے کی دھمکیاں دینے کے کئی سنگین الزامات لگائے تھے جس کے بعد وزارت کھیل نے ان الزامات کی تحقیقات کے لیے مانیٹرنگ کمیٹی قائم کرنے کا فیصلہ کیا تھا۔

وزارت نے کہا کہ یہ کمیٹی چار ہفتوں کے اندر اپنی انکوائری رپورٹ داخل کرے گی اور اس دوران برج بھوشن فیڈریشن کے صدر کا عہدہ چھوڑ دیں گے اور تحقیقات میں تعاون کریں گے۔ دریں اثنا، وزارت کھیل نے فیڈریشن کے اسسٹنٹ سکریٹری ونود تومر کو فوری طور پر معطل کر دیا تاکہ ’’ڈبلیو ایف آئی کے ہموار کام کو یقینی بنایا جا سکے۔‘‘ ہفتہ کو جاری ایک اور بیان میں وزارت نے کہا کہ تومر کا فیڈریشن میں رہنا اس ’’اعلی ترجیحی نظم و ضبط‘‘ کی ترقی کے لیے نقصان دہ ہے۔