حج 2024: دوسری قسط جمع کرانے کی تاریخ میں 28 مارچ تک توسیع

حج کمیٹی آف انڈیا کے سی ای او ڈاکٹر لیاقت علی آفاقی آئی آر ایس نے بتایا کہ حج اخراجات کی دوسری قسط جمع کرانے کی آخری تاریخ پہلے 10 مارچ مقرر کی گئی تھی جس میں ریاستی حج کمیٹیوں اور حج سے وابستہ سرکاری و غیر سرکاری تنظیموں کے مطالبہ پر 15 مارچ پھر 18 مارچ تک اور اب آخری موقع دیتے ہوئے چوتھی بار 28 مارچ تک توسیع کر دی گئی ہے۔ انہوں نے کہا کہ دوسری قسط جمع کرانے کی تاریخ میں اس کے بعد توسیع کی کوئی گنجائش نہیں ہے۔

ڈاکٹر آفاقی نے مزید بتایا اب تک 4886 عازمین نے دوسری قسط مبلغ 170000 جمع نہیں کرائی ہے، ان سے گزارش ہے کہ وہ معینہ تاریخ 28 مارچ تک دوسری قسط حج کمیٹی آف انڈیا کی ویب سائٹ https://hajcommittee.gov پر بتائے طریقے پر آن لائن یا آف لائن حج کمیٹی آف انڈیا کے اکاؤنٹ میں جمع کرا دیں۔ انہوں نے کہا کہ وہ عازمین جو 28 مارچ تک دوسری قسط جمع کرانے میں ناکام رہتے ہیں، ان کا عارضی انتخاب منسوخ کر دیا جائے گا۔

(یو این آئی ان پٹ کے ساتھ)