حج کے فارم جاری نہ ہونے پر حاجی ریاض الدین نے مرکزی وزیر برائے اقلیتی امور اسمرتی ایرانی کو لکھا خط

نئی دہلی: سفر حج 2023 کا ابھی تک اعلان نہیں ہوا ہے، جبکہ مئی کے آخر میں ہندوستان سے پروازیں روانہ ہونی ہیں۔ 9 جنوری کو حکومت ہند اور سعودی حکومت کے درمیان دو طرفہ معاہدہ بھی ہو چکا ہے جس میں ہندوستان کا حج کوٹہ ایک لاکھ پچھتر ہزار مختص کیا گیا ہے۔

قابل ذکر یہ ہے کہ ابھی تک نہ تو نئی حج پالیسی کا اعلان کیا گیا ہے اور نہ ہی سفرحج 2023 کے آن لائن فارم جاری کئے گئے ہیں۔ اس معاملے پر عوام میں بڑی بے چینی کی کیفیت بنی ہوئی ہے۔ اس بے چینی کو دیکھتے ہوئے سینئر حج رضاکار حاجی ریاض الدین نے آج مرکزی وزیر اقلیتی امور اسمرتی ایرانی کی رہائش گاہ پر ایک خط دیا اور ان کی توجہ اس جانب مبذول کراتے ہوئے مطالبہ کیا ہے کہ جلد از جلد حج کمیٹی آف انڈیا کے ذریعے حج فارم جاری کروانے کی ہدایت جاری کریں۔ اس موقع پر ان کے ساتھ حج رضاکار حاجی نواب احمد بھی موجود تھے۔

مرکزی وزیر کو لکھے خط میں حاجی ریاض الدین نے کہا کہ ملک کے مسلمان اور حج پر جانے والے عازمین تقریباً تین ماہ سے حج کے اعلان کا انتظار کر رہے ہیں۔ حج امور کے بیشتر کام وزارت خارجہ، وزارت شہری ہوا بازی، وزارت اقلیتی امور اور وزارت داخلہ کے ساتھ مل کر کئے جاتے ہیں۔ انہوں نے آگے لکھا ہے کہ میں آپ کی توجہ مبذول کروانا چاہتا ہوں کہ حج 2019 کا حج فارم 17 اکتوبر 2018 کو ویب سائٹ پر جاری کیا گیا تھا، حج 2020 کا حج فارم 10 اکتوبر 2019 کو ویب سائٹ پر جاری کیا گیا تھا،  اور 2022 کے لئے حج فارم 1 نومبر-2021 کو ویب سائٹ پر جاری کیا گیا تھا، جس میں حج کمیٹی آف انڈیا کی طرف سے عازمین کے کام اور عازمین کے فارم بھرنے کے لیے تقریباً چار ماہ کا وقت دیا گیا تھا۔ لیکن اس سال آج 3 فروری 2023 ہو چکا ہے اور حج 2023 کا فارم ابھی تک حج کمیٹی آف انڈیا کی طرف سے جاری نہیں کیا گیا ہے۔ اس حقیقت کے باوجود کہ 09-جنوری-2023 کو حج 2023 کے لئے ہندوستانی عازمین کے کوٹہ کا اعلان کر دیا گیا ہے۔

حاجی ریاض الدین نے لکھا کہ اس سلسلے میں میں آپ کی توجہ اس حقیقت کی طرف بھی مبذول کرواتا ہوں کہ میں گزشتہ 25 سال سے کسی سیاسی جماعت سے وابستہ ہوئے بغیر حجاج کرام کی سہولت کے لیے کام کر رہا ہوں۔ حج ہمارا بین الاقوامی سفر ہے جس پر آپ کو خصوصی توجہ دینی چاہیے اور حج کمیٹی آف انڈیا کو سختی سے ہدایات دیں کہ وہ اپنے ملک کے عازمین حج کو پریشانیوں اور مشکلات سے بچانے کے لئے بلا تاخیر حج فارم جاری کریں۔ مجھے یقین ہے کہ آپ اس سلسلے میں ذاتی دلچسپی لیں گی۔