حاجی علی درگاہ ٹرسٹ اور امیتابھ بچن نے کی مہاجر مزدوروں کی مدد، ہوائی جہاز سے کیا روانہ

ممبئی: بدحالی اور شکستہ حالی کے شکار مزدوروں کو اپنے آبائی وطن بھیجنے کے لئے آج یہاں ممبئی میں واقع بین الاقوامی شہرت یافتہ حضرت حاجی علیؒ درگاہ اور مشہور فلم اسٹار امیتابھ بچن نے آج 1200 مزدوروں کو بذریعہ طیارہ ان کے آبائی وطن بھیجنے کا فیصلہ کیا ہے جس کے تحت مزدوروں کی ایک کھیپ کو آج یہاں انڈیگو ایئرلائن کے خصوصی طیارے سے الہ آباد اور گورکھپور روانہ کیا گیا۔

800 مزدوروں پر مشتمل پہلا قافلہ ممبئی کے ایئرپورٹ سے روانہ کیا گیا جہاں پر امیتابھ بچن کی کمپنی اے بی سی ایل کارپوریشن کے افسران اور درگاہ ٹرسٹ کے ذمہ داران موجود تھے۔ جبکہ کل 400 مزدوروں کو بذریعہ فلائٹس ان کے آبائی وطن بھیجا جائیگا۔ امیتابھ بچن اے بی کارپوریشن کے منیجر راجیش یادو نے بتایا کہ امیتابھ بچن جی کو جب یہ معلوم ہوا کہ مزدور بد حالی میں زندگی گزار رہے ہیں اور پریشان حال مزدوروں کو گھر بھیجنے کے علاوہ کوئی چارہ نہیں ہے تو امیتابھ بچن نے یہ پہل کر تے ہوئے ان تمام مزدوروں کو بذریعہ طیارہ اپنے آبائی وطن بھیج دیا ہے۔

حاجی علی اور ماہم درگاہ کے ٹرسٹی سہیل کھنڈوانی نے بتایا کہ مزدوروں کی فہرست مرتب کی گئی تھی اس کے بعد مزدوروں کو گاؤں بھیجنے کا سلسلہ دراز کیا گیا ہے انہوں نے کہا کہ امیتابھ بچن کے ساتھ درگاہ انتظامیہ یہ خدمت انجام دے رہی ہے، درگاہ انتظامیہ نے غریبوں کو راشن کٹ کے ساتھ مزدوروں کو کھانے کے پیکٹ بھی تقسیم کیے ہیں انہوں نے کہا کہ پہلے ٹرین کے ذریعہ مزدوروں کو ان کے گاؤں بھیجا گیا تھا لیکن ٹرینوں کے معاملات میں تاخیر اور ٹرینوں کی منسوخی کے سبب اب فلائٹس سے مزدوروں کو بھیجا جا رہا ہے تاکہ وہ جلد از جلد اپنے آبائی وطن پہنچ سکیں۔

ماہم درگاہ کے آئی ٹی ڈائریکٹر صابر سید نے بتایا کہ درگاہ کمیٹی نے اس سے قبل تمام مزدوروں کی فہرست کا احاطہ کیا اور پھر ان کو راحت پہنچانے کے لئے گاؤں لے جانے کا انتظام کیا اس کام میں امیتابھ بچن جی اور راجیش یادو کا تعاون شامل حال رہا ہے ان کے بغیر یہ خدمت ممکن ہی نہیں تھی ایک اندازے کے مطابق اب تک کئی مزدوروں کو ان کے آبائی وطن ہم پہنچانے میں کامیاب ہوئے ہیں اور آئندہ بھی یہ سلسلہ جاری رہے گا کیونکہ جیسے جیسے مزدوروں کے ناموں کی فہرست آتی ہے اسی طرح سے ان کے گاؤں جانے کا انتظام کیا جاتا ہے ہم نے منظم نظام کے تحت یہ کام شروع کیا ہے جس میں مزدوروں کی امداد کی جا رہی ہے ریاست مہاراشٹر میں مزدور پریشان ہے اور ممبئی میں ایک بڑی آبادی مزدوروں کی ہے جو یومیہ کام کرکے اپنا گھر بار چلاتے تھے ان کا کاروبار پوری طرح سے ٹھپ ہوگیا ہے جس کی وجہ سے یہ مزدور اپنے گھر جانا چاہتے تھے ان مزدوروں کو اس آفت کے وقت میں درگاہ انتظامیہ اور امیتابھ بچن نے سہارا دیا ہے اور ان کی حتی الامکان مدد بھی کی ہے۔