مودی حکومت کو اگر سشما سوراج کی وہ تقریر یاد ہوتی، تو زرعی بل کسان مخالف نہیں ہوتے!

مرکزی حکومت کے ذریعہ تاناشاہی طریقے سے زرعی بل پاس کرائے جانے کے خلاف ملک بھر کے کسان سڑکوں پر ہیں اور احتجاجی مظاہرے کر رہے ہیں۔ کسانوں کی تحریک کا بڑا سبب زرعی بل کا وہ ضابطہ ہے جس میں کسانوں کو اپنی فصل کہیں پر بھی فروخت کرنے کی چھوٹ دی گئی ہے۔ اسی ایشو کو سابق مرکزی وزیر سشما سوراج نے لوک سبھا میں اپنی ایک تقریر کے ذریعہ سامنے رکھا تھا۔ اس تقریر کا ویڈیو اب کافی شیئر کیا جا رہا ہے۔

اس ویڈیو کو صحافی اوما شنکر سنگھ نے سوشل میڈیا پر شیئر کرتے ہوئے لکھا ہے کہ "سشما سوراج کی بی جے پی میں آڑھتی بس بچولیا نہیں تھا۔ سن لیجیے۔" یہ ویڈیو 2012 کا ہے، اس وقت مرکز میں کانگریس کی قیادت والی یو پی اے حکومت تھی۔ ویڈیو میں سشما سوراج کسانوں کے مفادات کی بات کرتے ہوئے کہتی ہیں ّّجو دیہی معیشت کو جانتا ہے صرف وہی اس بات کو پہچان سکتا ہے۔ دیہی معیشت یہ کہتی ہے کہ آپ کے بینکوں کے اے ٹی ایم تو آج آئے ہیں۔ آڑھتی کسانوں کا روایتی اے ٹی ایم ہے۔ کسان کو بیٹی کی شادی کرنی ہو، بینک کا قرض دینا ہو، بچے کی پڑھائی کرنی ہو، باپ کی دوائی کرانی ہو، سر پر صافہ باندھتا ہے سیدھے منڈی میں آڑھتی کے یہاں جا کر کھڑا ہو جاتا ہے۔"

ویڈیو میں سشما آگے کہتی ہیں کہ آڑھتی کسان کو صرف اس یقین پر پیسہ دیتا ہے کہ اسے معلوم ہے جب فصل آئے گی تو وہ بیل گاڑی میں بھر کر یہاں لائے گا اور وہ اسے فروخت کر اپنا پیسہ وصول کر لے گا۔ سشما نے کہا کہ "میں پوچھنا چاہتی ہوں کہ کیا والمارٹ اور ٹیسکو انھیں ادھر دے گا۔ کیا انھیں ہمدردی ہوگی کسان کی بیٹی کی شادی کی۔ اسے تو دھوتی اور صافے والے کسان سے بدبو آئے گی۔ کوئی کسان سے سیدھا خریدے گا۔ نئی ایجنسی کھڑی ہوں گی اور نئے بچولیے کھڑے ہو جائیں گے۔"