ہریانہ اسمبلی انتخاب سے قبل گرمیت رام رحیم کو جیل سے چاہیے چھٹی، 20 دنوں کی مانگی پیرول

آبروریزی کے جرم میں 20 سال کی سزا بھگت رہے ڈیرہ سچا سودا کے سربراہ گرمیت رام رحیم سنگھ نے ہریانہ اسمبلی انتخاب سے پہلے 20 دنوں کی پیرول مانگی ہے۔ 5 اکتوبر کو ہونے والے انتخاب کے لیے مثالی ضابطہ اخلاق نافذ ہونے کی وجہ سے ریاستی حکومت نے پیرول کی درخواست ہفتہ کو چیف الیکٹورل آفیسر (سی ای او) کو بھیجی ہے۔ پیرول کی یہ درخواست ہریانہ اسمبلی انتخاب سے کچھ دن پہلے کے لیے کی گئی ہے۔

ذرائع کا کہنا ہے کہ حکومت نے چیف الیکٹورل آفیسر کو مشاورت کے لیے تجویز کی درخواست بھیجی ہے۔ سی ای او نے اس کے بدلے میں قصوروار کی رہائی کے لیے ہنگامی صورتحال اور مجبوری کے بارے میں جانکاری مانگی ہے۔ گرمیت رام رحیم اس وقت روہتک کی سوناریا جیل میں بند ہے۔ 13 اگست کو باگپت واقع ڈیرہ میں رہنے کے لیے اسے 21 دن کی چھٹی دی گئی تھی۔

حال ہی میں ڈیرہ سربراہ گرمیت سنگھ کو بار بار پیرول اور چھٹی دیے جانے کے معاملے کو پنجاب اور ہریانہ ہائی کورٹ میں چیلنج کیا گیا تھا۔ ایس جی پی سی کی عرضی کو یہ کہتے ہوئے خارج کر دیا گیا کہ اہل اتھاریٹی اس معاملے میں ہریانہ جیل محکمہ کو فیصلہ لینے کا اختیار دیتی ہے۔

گرمیت رام رحیم کو اب تک دیے گئے پیرول یا فرلو کی بات کی جائے تو سب سے پہلے 24 اکتوبر 2020 کو انہیں اسپتال میں بھرتی اپنی ماں سے ملنے کے لیے ایک دن کی پیرول ملی۔ دوسری بار 21 مئی 2021 کو 12 گھنٹے کی پیرول ملی۔ 7 فروری 2022 کو 21 دنوں کی فرلو ملی۔ جون 2022 کو 30 دنوں کی پیرول ملی۔ 14 اکتوبر 2022 کو 40 دنوں کی پیرول ملی جس میں بابا گرمیت باگت آشرم میں رہا اور اس نے اس دوران میوزک ویڈیو بھی جاری کیا۔

21 جنوری 2023 کو چھٹی بار 40 دن کی پیرول ملی۔ 20 جولائی 2023 کو ساتویں بار 30 دن کی پیرول پر جیل سے چھٹی ملی۔ 21 نومبر 2023 کو 21 دن کی فرلو سے گرمیت سنگھ باغپت آشرم پہنچا۔ 19 جنوری 2024 کو 50 دنوں کے پیرول پر چھٹی ملی۔ 13 اگست 2024 کو 21 دنوں کی فرلو کو ہائی کورٹ نے منظوری دی۔