گجرات: مہسانہ میں بلڈروں سے پریشان کسان نے کی خودکشی

گجرات کے مہسانہ ضلع میں کچھ بلڈروں کی طرف سے ہراساں کیے جانے کے بعد ایک کسان نے خودکشی کر لی۔ بلڈر پر 5 لاکھ روپے کی دھوکہ دہی کا الزام ہے۔ متوفی کسان کرن کے بڑے بھائی جسو بھائی چودھری نے بلڈر کے خلاف کھیرالو پولیس اسٹیشن میں شکایت درج کرائی ہے۔ شکایت میں کہا گیا ہے کہ "میرے چھوٹے بھائی کو بلڈر کیول سنگھ اور دیگر چار لوگوں نے دھوکہ دیا تھا۔ انہوں نے اس کے کھیت کی طرف جانے والے راستے بند کر دیئے تھے۔ اسے کھیت پر جانے کی بھی اجازت نہیں تھی۔ جس سے پریشان ہوکر میرے بھائی نے ہفتے کے روز خودکشی کر لی۔"

ایف آئی آر میں جسو بھائی نے کہا کہ اس کا بھائی کھیرالو میں آبائی زرعی زمین پر کھیتی کرتا تھا، جہاں اس نے ایک گھر بنایا تھا اور اپنے خاندان کے ساتھ رہتا تھا۔ ونو بھائی چودھری اور کیول چودھری نے کھیت کی طرف جانے والی سڑک پر ایک تجارتی کمپلیکس بنا دیا جس سے راستہ روک گیا۔ کسان کرن نے ان سے درخواست کی کہ اسے کھیت جانے کا راستہ دے دیں، لیکن انہوں نے انکار کر دیا۔

بلڈر نے راستہ دینے کی شرط رکھی اور کہا کہ وہ کمپلیکس میں ایک دکان خرید لے۔ اس پر اس نے رضامندی ظاہر کی اور 5 لاکھ روپے کی ڈاؤن پیمنٹ کر دی۔ جزوی ادائیگی کرنے کے بعد بھی بلڈر نے کرن کو کھیت کی طرف جانے کا راستہ نہیں دیا اور انہوں نے دکان بھی نہیں دی جس کے لیے اس نے 5 لاکھ روپے ادا کیے تھے۔

بلڈرز کی طرف سے ہراساں کیے جانے کے بعد کرن کے پاس کوئی چارہ نہیں بچا اور اس نے پھانسی لگا کر خودکشی کر لی۔ کھیرالو پولیس انسپکٹر اے ٹی پٹیل نے کہا کہ بلڈرز کے خلاف خودکشی کے لیے اکسانے کا مقدمہ درج کیا گیا ہے۔ انہوں نے کہا کہ "پولیس تحقیقات کرے گی، بلڈرز اور اس کے ساتھیوں کو جلد ہی گرفتار کر لیا جائے گا۔"