پی ایم مودی سڑک کے راستے سومناتھ جائیں، یہاں کی حالت دیکھیں: کانگریس رکن اسمبلی

گجرات میں کئی علاقوں کی سڑکیں خستہ حالی کی شکار ہیں۔ ایسے میں کانگریس رکن اسمبلی ویمل چڈاسما نے وزیر اعظم نریندر مودی کو خط لکھ کر گڈھوں والی سڑک کی طرف توجہ دلائی ہے اور کہا ہے کہ بھاؤنگر سے سومناتھ کا سفر کریں۔ سومناتھ انتخابی حلقہ سے رکن اسمبلی چڈاسما نے خط میں لکھا ہے کہ ’’مرکزی حکومت کے ذریعہ سات سال قبل ساحلی شاہراہ کو منظوری دی گئی تھی، شاہراہ نامکمل ہے اور تعمیری کام سست رفتاری سے چل رہا ہے۔ لیکن باقی سڑکوں پر، کئی مقامات پر بہت سارے گڈھے ہیں جس کی وجہ سے حادثات ہوتے رہتے ہیں۔ حالانکہ میں نے مرکزی وزیر برائے سڑک ٹرانسپورٹیشن اور شاہراہ کو خط لکھا تھا، لیکن کوئی کارروائی نہیں کی گئی ہے۔‘‘

کانگریس رکن اسمبلی نے کہا کہ ان کا ماننا ہے کہ اگر وزیر اعظم اس (بھاؤنگر) شاہراہ پر سڑک کے راستے سے سفر کرتے ہیں تو وہ لوگوں کی مشکلات کا اندازہ لگا پائیں گے، اور تبھی مسائل کا حل نکالا جا سکتا ہے۔

قابل ذکر ہے کہ وزیر اعظم نریندر مودی 27 اگست سے گجرات کے دو روزہ دورے پر رہیں گے۔ چڈاسما چاہتے ہیں کہ وزیر اعظم اس سفر کے دوران سڑک کے راستے سومناتھ جائیں۔ انھوں نے کہا کہ وزیر اعظم سومناتھ مندر ٹرسٹ کے چیئرمین ہیں اور پاکیزہ مہینے ساون کے دوران لاکھوں عقیدتمند اس شاہراہ پر سفر کرتے ہیں۔ چڈاسما نے کہا کہ انھیں بھکتوں کے مسائل کو سمجھنا چاہیے۔