گجرات: بی جے پی حکومت نے سی این جی اور پی این جی پر لگنے والے ویٹ میں 10 فیصد تخفیف کا کیا اعلان

گجرات میں اسمبلی انتخاب قریب ہے۔ ابھی الیکشن کمیشن نے بھلے ہی گجرات میں انتخاب کو لے کر کسی طرح کا اعلان نہیں کیا ہے، لیکن امید کی جا رہی ہے کہ دیوالی کے بعد اس سلسلے میں کبھی بھی اعلان کیا جا سکتا ہے۔ اس دوران گجرات کی بی جے پی حکومت نے ایک بڑا اعلان کیا ہے جو ریاستی عوام کے لیے کچھ سکون دینے والا ہے۔ ریاستی حکومت نے ریاست میں سی این جی اور پی این جی پر لگنے والے ویٹ (ویلیو ایڈیڈ ٹیکس) میں 10 فیصد کی تخفیف کا اعلان کیا ہے۔ یہ فیصلہ تہواری سیزن میں لوگوں کے لیے ایک تحفہ کی مانند ہے۔ حالانکہ کئی لوگ اسے اسمبلی انتخاب کے پہلے ووٹرس کو ’خوش‘ کرنے کی کوشش بتا رہے ہیں۔

خبر رساں ایجنسی اے این آئی کی ایک رپورٹ کے مطابق گجرات حکومت میں وزیر جیتو واگھانی نے آج حکومت کے ذریعہ سی این جی-پی این جی پر لگنے والے ویٹ میں تخفیف کیے جانے کی اطلاع دی۔ انھوں نے کہا کہ حکومت کے اس فیصلے کے بعد صارفین کو بڑی راحت ملے گی۔ اندازے کے مطابق 10 فیصد ویٹ گھٹنے سے ایک طرف جہاں سی این جی کی قیمت میں 6 سے 7 روپے کی کمی دیکھنے کو مل سکتی ہے، وہیں پی این جی کی قیمت بھی 5 سے 6 روپے تک گھٹ سکتی ہے۔

ویسے پی ٹی آئی نے قبل میں ایک رپورٹ شائع کی تھی جس میں بتایا گیا تھا کہ مارچ 2022 سے اب تک ریاست میں سی این جی کی قیمت میں 22.60 روپے کا اضافہ کیا گیا ہے۔ یعنی ویٹ میں 10 فیصد تخفیف کے باوجود ایسا نہیں ہے کہ قیمتوں میں اتنی کمی ہوگی جتنی کہ گزشتہ کچھ مہینوں میں اضافہ دیکھنے کو ملا ہے۔ گزشتہ 21 مئی کو ہی سی این جی کی قیمت میں 2 روپے فی کلوگرام کا اضافہ کیا گیا تھا۔