سرکار کی منصوبہ بندی سے چھتیس گڑھ میں کھیتی-کسانی کے تئیں دلچسپی بڑھی: بھوپیش

رائے پور: چھتیس گرھ کے وزیراعلیٰ بھوپیش بگھیل نے کہا ہے کہ ریاستی حکومت کے پروجیکٹس اور منصوبہ بندی کے سبب چھتیس گڑھ میں کسانوں کی کھیتی-کاشت کاری کے تئیں دلچسپی بڑھی ہے۔ بھوپیش بگھیل نے اسمبلی میں آج رواں مالی سال کے 505 کروڑ 700 روپیے تیسرے ضمنی بجٹ پر ہوئی بحث کا جواب دیتے ہوئے انہوں نے ایوان کو یقین دہانی کروائی کہ کسانوں کو راجیو گاندھی کسان نیائے یوجنا کی چوتھی قسط اس مالی سال کے ختم ہونے کے پہلے پہلے مل جائے گی۔ رواں مالی سال کا اہم بجٹ 95 ہزار 650 کروڑ روپیے کا تھا۔ اول، دوم اور سوم ضمنی بجٹ کو ملا کر بجٹ اب ایک لاکھ دو ہزار 349 کروڑ روپیے ہوگیا ہے۔

بھوپیش بگھیل نے کہا کہ گزشتہ حکومت نے کسانوں کی قرض معافی اور ہر سال بونس دینے کا وعدہ کیا تھا، جسے پورا نہیں کیا گیا۔ گزشتہ حکومت کی مدت کار میں چھتیس گڑھ میں کسانی کا دائرہ مسلسل سکڑتا جا رہا تھا۔ کم از کم امدادی قیمت پر دھان بیچنے کے لیے 15 لاکھ کسانوں نے رجسٹریش کروایا تھا، جس میں سے محض 12 لاکھ کسانوں نے دھان فروخت کیا تھا۔ رواں سال 21 لاکھ کسانوں نے ایم ایس پی پر دھان بیچنے کے لیے رجسٹریشن کرایا جس میں سے ساڑھے 20 لاکھ کسانوں نے دھان فروخت کیا تھا۔ اس بار ہماری مدت کار میں دھان کے رقبے میں 21 لاکھ ہیکٹیئر تک کا اضافہ بھی ہوا ہے۔

انہوں نے کہا کہ مرکزی حکومت چھتیس گڑھ کے ساتھ تفریق کر رہی ہے۔ جب سے چھتیس گڑھ میں نئی حکومت بنی ہے مرکزی حکومت کی جانب سے مرکزی محصولات میں ریاست کے حصے میں 14 ہزار 73 کروڑ روپیے کی کمی کی گئی ہے۔ مرکزی حکومت کے نئے بجٹ میں ایکسائز ڈیوٹی کم کرنے اور پٹرول-ڈیزل میں چار فیصد سیس لگانے کا التزام کیا گیا ہے۔ سیس کی پوری رقم مرکز کو جائے گی، جس سے چھتیس گڑھ کو 1000 کروڑ روپیے کا نقصان ہوگا۔ 14 ہزار 73 کروڑ روپیے کی رقم اگر مل جاتی تو ہمیں قرض لینے کی ضرورت ہی نہیں ہوتی۔ بھوپیش بگھیل کے جواب کے بعد ایوان نے ضمنی مطالبات کو منظوری دے دی۔