'میگھالیہ میں این پی پی-بی جے پی کے بغیر بھی بن سکتی ہے حکومت، بات چیت جاری'، مکل سنگما کے بیان سے دہلی تک ہلچل

میگھالیہ اسمبلی انتخاب کے نتائج سہ رخی آنے کے بعد نیشنل پیپلز پارٹی (این پی پی) چیف کونراڈ سنگما نے بی جے پی کی حمایت سے حکومت بنانے کا دعویٰ پیش کر دیا ہے، لیکن اس درمیان ترنمول کانگریس لیڈر مکل سنگما نے یہ کہہ کر سنسنی پھیلا دی ہے کہ اگلی حکومت این پی پی-بی جے پی اتحاد کے بغیر بھی بن سکتی ہے اور اس کے لیے وہ بات چیت کر رہے ہیں۔

مکل سنگما نے جمعہ کے روز کہا کہ ہم این پی پی اور بی جے پی کو چھوڑ کر ہر سیاسی پارٹی کے ساتھ بات چیت کر رہے ہیں۔ سبھی نے ریاست کے بہتر مفاد کے لیے ساتھ آنے کی خواہش ظاہر کی ہے۔ ترنمول کانگریس لیڈر کے مطابق ریاست میں کانگریس اور دیگر علاقائی پارٹیوں مثلاً یونائٹیڈ ڈیموکریٹک پارٹی، ہل اسٹیٹ پیپلز ڈیموکریٹک پارٹی اور دیگر چھوٹی پارٹیوں کے ساتھ تبادلہ خیال چل رہا ہے۔

این پی پی نے 26 سیٹیں جیت ہیں، جبکہ بی جے پی کو دو سیٹ ملی ہے۔ کانگریس اور ترنمول کانگریس نے 5-5 سیٹیں جیتی ہیں، جبکہ یو ڈی پی کو 11 سیٹیں، وائس آف دی پیپل پارٹی کو 4 سیٹیں، پیپلز ڈیموکریٹک فرنٹ اور ہل اسٹیٹ پیپلز ڈیموکریٹک پارٹی کو 2-2 سیٹیں ملی ہیں۔ علاوہ ازیں 2 آزاد امیدواروں نے بھی کامیابی حاصل کی ہے۔ اگر این پی پی اور بی جے پی کو چھوڑ کر دو آزاد امیدوار سمیت سبھی سیاسی پارٹیاں ایک ساتھ آ جائیں تو وہ 60 رکنی ایوان میں جادوئی نمبر پار کر سکتے ہیں۔

مکل سنگما نے کہا کہ مینڈیٹ نتیجہ خیز نہیں تھا۔ کسی کو بھی مکمل اکثریت نہیں ملی ہے، اس لیے ہم بات چیت کر رہے ہیں۔ ممکنہ وزیر اعلیٰ کے بارے میں پوچھے جانے پر انھوں نے کہا کہ فی الحال ہم صرف ریاست کے مفاد کے بارے میں فکرمند ہیں۔ میگھالیہ میں گزشتہ حکومت میں بڑے پیمانے پر بدعنوانی ہوئی ہے اور لوگ اس طرح پرانی حکومت کو برقرار نہیں رکھنا چاہتے ہیں۔ لہٰذا وزیر اعلیٰ اور باقی چیزیں بعد میں طے کی جا سکتی ہیں۔