جموں و کشمیر کے نوجوانوں کی صلاحیتوں کو نکھارنا لازمی: لیفٹیننٹ گورنر

بہتر کل کے لئے نوجوانوں کو با اختیار بنانا لازمی ہے، جب ہم نوجونوں کو با اختیار بناتے ہیں تو ہم قوم کو با اختیار بناتے ہیں۔ نوجوانوں کو با اختیار بنا کر معاشی و معاشرتی تبدیلی لانا وقت کا اہم تقاضا ہے جس کے لئے تمام متعلقین کی اجتماعی کوششیں لازمی ہیں۔لیفٹیننٹ گورنر منوج سنہا نے ان خیالات کا اظہار پیر کے روز نوجوانوں کو با اختیار بنانے کے پروگرام کی بہتر عمل آوری کے لئے طریقہ کار پر غور و خوض کرنے کے لئے منعقدہ میٹنگ کی صدارت کرتے ہوئے کیا جو یونین ٹریٹری حکومت نے نوجوانوں کے لئے روز گار کی فراہمی سے متعلق مرتب کر رہی ہے۔

لیفٹیننٹ گورنر نے کہا کہ یو ٹی کے نوجوان کافی باصلاحیت ہیں اور مجوزہ پروگرام اُن کو معاونت فراہم کرنے کے لئے ایک ادارہ جاتی نظام ثابت ہوگا۔انہوں نے متعلقہ افسران کو نوجوانوں کو با اختیار بنانے کے لئے بہترین عالمی طریقہ کار اختیار کرنے کے لئے کہا اور اس کے ساتھ ہی بزنسا سکولوں کوا سٹیڈیز میں شامل کرنے کے لئے کہا۔

انہوں نے کہا کہ ہمیں خطے میں نوجوانوں میں اعتماد اور اثبات کا ماحول قائم کرنا ہوگا اور نوجوانوں کے مسائل اور ضروریات کی جانب توجہ دینی ہوگی۔

لیفٹیننٹ گورنر نے ہر ضلع میں ڈسٹرکٹ یوتھ سینٹر قائم کرنے کی تجویز بھی پیش کی۔انہوں نے نوجوانوں کے لئے مواقع سکل ڈیولپمنٹ، تعلیم، کھیل کود، سیاحت، زراعت اور ان سے منسلک شعبوں کے ذریعے قائم کرنے کے لئے کہا۔

انہوں نے کہا جموں و کشمیر یوٹی میں 65 فیصد آبادی 37 برس سے کم عمر کے نوجوانوں پر مشتمل ہے اور حکومت نوجوانوں کو کھیل کود، روزگار، تفریح، تعلیم، کونسلنگ پروگراموں میں شامل کرنا چاہتی ہے تاکہ اُن کے مستقبل کی تعمیر اُن کی آرزﺅں اور امنگوں کے مطابق کی جاسکے۔

سی ای او مشن یوتھ اور ایڈیشنل سیکرٹری خزانہ ڈاکٹر سید عابد رشید شاہ نے پروگرام پر ایک مفصل پرزنٹیشن پیش کی اور لیفٹیننٹ گورنر کو نوجوانوں کو با اختیار پروگرام کے لئے مختلف پہلوﺅں کے بارے میں انہیں جانکاری دی۔

چیف سیکرٹری بی وی آر سبھرامنیم، پرنسپل سیکرٹری داخلہ شالین کابرا، پرنسپل سیکرٹری بجلی و اطلاعات روہت کنسل، سیکرٹری سکول ایجوکیشن بشوا جیت کمار سنگھ، لیفٹیننٹ گورنر کے پرنسپل سیکرٹری نتیشور کمار، صوبائی کمشنر کشمیر پی کے پولے، سیکرٹری امور نوجوان و کھیل کود، سیاحت اور ثقافت سرمد حفیظ، ایڈیشنل سیکرٹری خزانہ سید عابد رشید شاہ اور دیگر سینئر افسران نے راج بھون میں منعقدہ میٹنگ میں شرکت کی۔