حکومت ہند کا وکی پیڈیا کو نوٹس، جھوٹی اور غلط معلومات فراہم کرنے پر جواب طلب

ایکس (سابقہ ٹوئٹر) اور فیس بُک پر ایکشن لینے کے بعد اب مرکزی حکومت نے وکی پیڈیا کو نوٹس بھیج دیا ہے۔ حکومت نے وکی پیڈیا کو ایک خط بھیجا ہے جس میں اس سے کچھ شکایت پر جواب طلب کیا ہے۔ وکی پیڈیا پر الزام ہے کہ وہ متعصب اور غلط معلومات فراہم کر رہا ہے۔ پلیٹ فارم سے یہ سوال بھی کیا گیا ہے کہ اسے ’ثالث‘ کے بجائے 'پبلشر' کیوں تصور نہیں کیا جانا چاہیے۔

جانکاری کے مطابق، انٹرنیٹ انسائیکلوپیڈیا کو لکھے گئے خط میں اس بات پر زور دیا گیا ہے کہ ایڈیٹرز کے ایک محدود گروپ کا مواد پر زیادہ کنٹرول ہے، جس کی وجہ سے مواد غیر جانبدار نہیں ہے۔

وکی پیڈیا کو نوٹس کا یہ معاملہ دہلی ہائی کورٹ میں چل رہی ایک قانونی لڑائی کے درمیان سامنے آیا ہے، جس میں نیوز ایجنسی ایشین نیوز انٹرنیشنل (اے این آئی) نے ان صارفین کے بارے میں جانکاری مانگی ہے جنہوں نے فرم کے بارے میں ایک اندراج میں تبدیلی کی تھی۔ حالانکہ، ابھی تک نہ تو وکی پیڈیا اور نہ ہی حکومت ہند کی طرف سے اس سے متعلق کوئی آفیشل بیان جاری کیا گیا ہے۔ یہ جانکاری ذرائع کے حوالے سے ملی ہے۔

قابل ذکر ہے کہ وکی پیڈیا ایک فری پلیٹ فارم ہے جہاں سے دنیا بھر کے لوگ معلومات حاصل کر سکتے ہیں۔ حالانکہ، یہاں دی گئی معلومات کچھ ہی لوگوں کے ذریعہ لکھی جاتی ہیں، اس لیے ان میں کچھ غلطیاں بھی ہو سکتی ہیں۔ وکی پیڈیا کی شروعات 2001 میں انگریزی زبان میں ہوئی تھی، جبکہ ہندی وکی پیڈیا 2003 اور اردو 2004 میں شروع کی گئی تھی۔