تہوار کے موسم میں پیاز مہنگی ہونے سے حکومت پریشان

تہوار کے موسم میں پیاز کی قیمتیں صارفین کی آنکھوں میں آنسو لارہی ہیں۔ ایسے میں مرکزی حکومت نے پیاز کی مہنگی قیمتوں پر قابو پانے کے لیے بڑا فیصلہ لیا ہے۔ دہلی-این سی آر کے لوگوں کو مہنگی پیاز سے راحت فراہم کرنے کے لیے حکومت نے مہاراشٹر کے ناسک سے این سی سی ایف کے ذریعے پیاز منگوایا ہے جسے تہوار کے موسم میں دہلی این سی آر میں رعایتی قیمتوں پر دیا جائے گا ۔ حکومت کا ماننا ہے کہ اس قدم سے تہوار کے موسم میں پیاز کی دستیابی بڑھانے میں مدد ملے گی اور قیمت کے محاذ پر بھی راحت ملے گی۔

وزارت نے اعلان کیا ہے کہ 1600 میٹرک ٹن پیاز ناسک سے دہلی تک 42 بی سی این ویگنوں میں ریل کے ذریعے لائی جائے گی  جو کہ 53 ٹرکوں کے برابر ہے۔ یہ پیاز 20 اکتوبر 2024 تک دہلی پہنچنے کی امید ہے۔

صارفین کے امور کے محکمے کی سکریٹری ندھی کھرے نے کہا کہ پیاز کی نقل و حمل میں ریل کا استعمال ایک اہم قدم ہے اور پیاز کو تیزی سے ٹھکانے لگانے کے لیے دیگر مقامات کو بھی استعمال کیا جائے گا۔ پیاز کو لکھنؤ اور وارانسی کو بھی ریل کے ذریعہ سپلائی کیا جائے گا۔ صارفین کے امور کے محکمے نے وزارت ریلوے سے ناسک سے شمال مشرقی خطہ بشمول نیو جلپائی پوری، ڈبرو گڑھ، نیو تینسوکیا اور چنگساری میں پیاز بھیجنے کی اجازت طلب کی ہے۔ اس سے ملک کے کونے کونے میں مناسب قیمت پر پیاز کی دستیابی کو بڑھانے میں مدد ملے گی۔