کورونا بحران: جامعہ نے انفارمیشن ٹیکنالوجی کا کیا بہترین استعمال، درجنوں طلبا کا ہوا آن لائن وائیوا

کورونا بحران میں تعلیمی نظام پر کافی اثر دیکھنے کو مل رہا ہے۔ سوشل ڈسٹنسنگ اور کورونا انفیکشن کے پھیلاؤ سے بچنے کے لیے کلاسز آن لائن ہو رہے ہیں اور کئی امتحانات بھی آن لائن ہی منعقد کیے جا رہے ہیں۔ اس سلسلے میں دہلی کی جامعہ ملیہ اسلامیہ (جے ایم آئی) نے جدید ٹیکنالوجی کا بہترین استعمال کرتے ہوئے کئی پی ایچ ڈی اور ایم فل طلبا کا آن لائن وائیوا لیا۔ ورچوئل انداز میں لیے گئے ان امتحانات کی وجہ سے طلبا کے سامنے کھڑے مسائل حل ہوئے اور کورونا بحران میں وائیوا وائس (زبانی امتحان) کی جو دقتیں پیش آ رہی تھیں، وہ آسان ہو گئیں۔

جامعہ ملیہ اسلامیہ بڑے پیمانے پر انفارمیشن ٹیکنالوجی کا استعمال کرتے ہوئے ورچوئل ایم فل/پی ایچ ڈی وائیوا وائس اور پی ایچ ڈی پری-سب مشن کے کام جاری رکھے ہوئے ہے۔ جامعہ ملک کے ان تعلیمی اداروں میں شامل ہے جس نے ایم فل/پی ایچ ڈی وائیو آن لائن منعقد کرنے کا عمل شروع کیا ہے اور انتہائی کامیابی کے ساتھ یہ سلسلہ جاری ہے۔

ایک رپورٹ کے مطابق کورونا بحران کی وجہ سے لاک ڈاؤن کے بعد سے اب تک جامعہ ملیہ اسلامیہ نے 76 پی ایچ ڈی وائیوا وائس، 5 پی ایچ ڈی پری-سب مشن، 1 ایم فل/پی ایچ ڈی وائیوا وائس، 6 ایم فل وائیوا وائس اور 2 ایم ٹیک وائیوا وائس کا انعقاد کیا ہے۔ وائیوا وائس کا انعقاد گوگل میٹ پر کیا جا رہا ہے اور سبھی وائیوا وائس ریکارڈ کیے گئے ہیں تاکہ بعد میں ان کا بطور ثبوت استعمال ہو سکے۔

بتایا جاتا ہے کہ جامعہ ملیہ اسلامیہ میں آن لائن وائیوا وائس کا عمل 11 جون 2020 سے شروع ہوا اور سنٹر فار انفارمیشن ٹیکنالوجی (سی آئی ٹی) اس کے لیے سہولیات مہیا کرا رہا ہے۔ اس کے علاوہ سی آئی ٹی نے درجنوں ویبینار اور تربیتی پروگرام، سی اے ایس کے تحت سلیکشن کمیٹیوں، مالیاتی کمیٹی کی میٹنگوں، ورکنگ کمیٹی کی میٹنگوں اور یونیورسٹی کی دیگر اہم میٹنگوں کے انعقاد میں بھی مدد کی ہے۔ جامعہ کی وائس چانسلر پروفیسر نجمہ اختر کی ہدایات پر آن لائن تربیت اور دیگر سرگرمیاں بھی شروع ہو گئی ہیں۔ انھوں نے کووڈ-19 وبا کے سبب پڑھائی اور اس سے جڑے دیگر کاموں کو نقصان سے بچانے کے لیے آئی ٹی تکنیک کے استعمال پر زور دیا ہے۔