مغربی بنگال کے سابق وزیر اعلیٰ بدھ دیب بھٹاچاریہ کو 11 دن بعد ملی اسپتال سے چھٹی

کولکاتا: مغربی بنگال کے سابق وزیر اعلی بدھ دیب بھٹاچاریہ کو 11 دن کے بعد بدھ کو اسپتال سے ڈسچارج کر دیا گیا۔ انہیں 29 جولائی کو سانس کی شدید تکلیف کے بعد داخل کرایا گیا تھا۔ انہیں گرین چینل کے ذریعے پام ایونیو پر واقع ان کے اپارٹمنٹ میں منتقل کر دیا گیا۔

ان کی اہلیہ میرا بھٹاچاریہ نے صحافیوں کو بتایا کہ سابق وزیر اعلیٰ کو ان کی رہائش گاہ پر سخت نگرانی میں رکھا جائے گا۔ انہوں نے کہا ’’میں آپ سب سے ان کی صحت یابی کے لیے درخواست کرتی ہوں۔ وہ اب خطرے سے باہر ہیں لیکن انہیں ان کی رہائش گاہ پر مسلسل نگرانی اور سخت پابندیوں میں رکھا جائے گا۔‘‘

انہوں نے کہا ’’میں ہر اس شخص کا شکریہ ادا کرتی ہوں جو اسپتال میں داخل ہونے کے دوران ہمارے ساتھ تھے یا ان کی صحت کے بارے میں پوچھ رہے تھے۔‘‘

دریں اثنا، اسپتال کے ذرائع نے بتایا کہ ان کے گھر میں بلڈ پریشن اور آکسیجن لیول کی مسلسل نگرانی کے لیے ایک مشین اور کارڈیک مانیٹرنگ سسٹم نصب کیا گیا ہے۔ ان کے علاج کے لیے بنائے گئے میڈیکل بورڈ کے ارکان باقاعدگی سے ان کے گھر جائیں گے اور ان کا معائنہ کریں گے۔ ان کی فزیوتھراپی بھی جاری رہے گی۔