آر جی کار میڈیکل کالج کے سابق پرنسپل سندیپ گھوش گرفتار

مرکزی تفتیشی بیورو (سی بی آئی) نے پیر کو کولکتہ کے آر جی کار  میڈیکل کالج اور ہسپتال کے سابق پرنسپل سندیپ گھوش کو گرفتار کر لیا ہے۔ سندیپ گھوش کو آر جی کار اسپتال میں مالی بے ضابطگیوں کے معاملے میں گرفتار کیا گیا ہے۔ اس معاملے کی جانچ بنگال پولس کی ایس آئی ٹی کر رہی تھی، تاہم کچھ دن پہلے کلکتہ ہائی کورٹ کے حکم پر کیس سی بی آئی کو منتقل کر دیا گیا تھا۔ سندیپ گھوش کی گرفتاری ایسے وقت میں ہوئی ہے جب سی بی آئی آر جی کار اسپتال کے جونیئر ڈاکٹر کی عصمت دری اور قتل کے معاملے میں ان پر اپنی گرفت مضبوط کر رہی ہے۔

گھوش کے علاوہ سی بی آئی نے اس معاملے میں تین اور لوگوں کو گرفتار کیا ہے۔ گرفتار ہونے والوں میں بپلو سنگھا، سمن ہزارہ، افسر علی شامل ہیں۔ گزشتہ ہفتے ہی، سی بی آئی نے گھوش اور دیگر کے خلاف دفعہ 120B (مجرمانہ سازش)، آئی پی سی کی دفعہ 420 (دھوکہ دہی) اور انسداد بدعنوانی ایکٹ کی دفعہ 7 کے تحت مقدمہ درج کیا تھا۔

ان مقدمات میں سزا کی بات کریں تو 120B میں زیادہ سے زیادہ 2 سال سے عمر قید، 420 میں زیادہ سے زیادہ 7 سال اور انسداد بدعنوانی ایکٹ میں 6 ماہ سے 5 سال تک کی سزا کا انتظام ہے۔

9 اگست کو کولکتہ کے آر جی کار میڈیکل کالج اور اسپتال میں رات کی ڈیوٹی پر تعینات ایک جونیئر ڈاکٹر کی مبینہ عصمت دری کی گئی۔ اس کے بعد اسے بے دردی سے قتل کر دیا گیا۔ اس وقت گھوش انسٹی ٹیوٹ کے انچارج تھے۔ اس معاملے میں ملزم سنجے رائے کو گرفتار کر لیا گیا ہے۔

تاہم اس پورے معاملے میں ان کے کردار کو بھی مشکوک قرار دیا جا رہا ہے۔ گھوش سی بی آئی کے ریڈار پر ہیں۔ سی بی آئی بھی ان سے مسلسل پوچھ تاچھ کر رہی ہے۔ اس کے علاوہ سی بی آئی نے سندیپ گھوش کا پولی گرافی ٹیسٹ بھی کرایا تھا۔ سی بی آئی ذرائع کا کہنا ہے کہ گھوش پوچھ تاچھ کے دوران مسلسل اپنے بیانات بدل رہے ہیں اور جانچ ایجنسی ان کے جوابات سے مطمئن نہیں ہے۔