این سی بی ممبئی زون کے سابق ڈائریکٹر سمیر وانکھیڈے کے ہوٹل اور بار کا لائسنس منسوخ

ممبئی: سمیر وانکھیڈے اب این سی بی کے ممبئی زون کے ڈائریکٹر نہیں رہے، تاہم ان کی پریشانیاں ابھی ختم نہیں ہوئی ہیں۔ بدھ کے روز مہاراشٹر میں ہی سمیر وانکھیڈے کے ایک ہوٹل جس میں بار (شراب خانہ) بھی تھا، اس کا لائسنس منسوخ کر دیا ہے۔ ایسا کیوں کیا گیا، اس کی وجہ بھی بیان کی گئی ہے۔

مہاراشٹر کے نوی میں واقعہ سمیر وانکھیڈے کے سدگرو ہوٹل اینڈ بار نام سے ہوٹل تھا۔ اس کا لائسنس ٹھانے کلکٹر نے منسوخ کیا ہے۔ کہا گیا ہے کہ سمیر وانکھیڈے کی جانب سے لائسنس کے حصول کے لئے جو کاغذات پیش کئے گئے تھے، وہ فرضی پائے گئے ہیں، اس وجہ سے ان کا لائسنس منسوخ کیا گیا ہے۔

ٹھانے کے ایس پی آباکاری نیلیش سانگدے نے اس معاملہ پر کہا کہ سدگرو ہوٹل اینڈ بار کا لائسنس منسوخ کیا ہے۔ ایسا ضلع مجسٹریٹ کے حکم پر کیا گیا ہے۔ اس سے پہلے ضلع مجسٹریٹ نے سمیر وانکھیڈے کو نوٹس بھی جاری کیا تھا۔ تفتیش میں انکشاف ہوا کہ جس وقت لائسنس کے لئے درخواست پیش کی گئی تھی، اس وقت ان کی عمر 21 سال سے کم تھی، لہذا سدگرو ہوٹل اینڈ بار کا لائسنس منسوخ کیا جا رہا ہے۔

رپورٹ کے مطابق لائسنس کے لئے درخواست پیش کرتے ہوئے این سی بی کے سابق زونل ڈائریکٹر سمیر وانکھیڈے کی عمر 17 سال 10 مہینے تھی، جبکیہ ایکسائز ڈیپارٹمنٹ کا کہنا ہے کہ لائسنس 21 سال کی عمر میں جاری کیا جاتا ہے۔

اس سے پہلے سمیر وانکھیڈے پر بدعنوانی کے الزامات لگے تھے۔ یہ الزامات کروز کیس کے ایک آزاد گواہ نے لگائے تھے۔ کرن گوساوی کے باڈی گارڈ پربھاکر سیل نے دعویٰ کیا تھا کہ شاہ رخ خان کے بیٹے کی رہائی کے لیے 25 کروڑ کی ڈیل پر بات ہو رہی تھی اور آخر کار 18 کروڑ میں ڈیل طے پائی، جس میں سے 8 کروڑ سمیر وانکھیڈے کو حاصل ہوئے تھے۔

اس کے بعد مہاراشٹر کے وزیر نواب ملک نے سمیر وانکھیڈے کے خلاف ایک ایک کر کے ایسے انکشافات کیے کہ سمیر وانکھیڈے مشکل میں پڑ گئے۔ یہاں تک کہ انہیں آرین خان سے متعلق منشیات کیس کی تحقیقات سے بھی ہٹا دیا گیا تھا۔ نواب ملک نے کہا تھا کہ سمیر کو جعلی کاسٹ سرٹیفکیٹ کی بنیاد پر این سی بی میں نوکری ملی تھی۔ نواب ملک نے سمیر کی دو بار شادی کرنے کا معاملہ بھی اٹھایا تھا۔