جموں و کشمیر کے سابق گورنر ستیہ پال ملک کو بدعنوانی کے دو معاملوں میں سی بی آئی نے کیا طلب

جموں و کشمیر کے سابق گورنر ستیہ پال ملک کو سی بی آئی نے نوٹس جاری کر پوچھ تاچھ کے لیے طلب کیا ہے۔ میڈیا رپورٹس کے مطابق سی بی آئی نے اپنے نوٹس میں ستیہ پال ملک سے بدعنوانی کے معاملوں کو لے کر پوچھ تاچھ میں شامل ہونے کے لیے کہا ہے۔ میڈیا رپورٹس میں بتایا جا رہا ہے کہ ستیہ پال ملک سے رواں ماہ کی 27 اور 28 اپریل کو پوچھ تاچھ ہو سکتی ہے۔ حالانکہ سی بی آئی نے اس نوٹس اور ستیہ پال ملک سے پوچھ تاچھ کی خبروں سے متعلق ابھی تک کچھ بھی آفیشیل طور پر جانکاری نہیں دی ہے۔

سی بی آئی کے ذریعہ ستیہ پال ملک کو نوٹس بھیجے جانے کی خبر پھیلنے کے بعد کانگریس نے اس سلسلے میں مرکز کی مودی حکومت کو تنقید کا نشانہ بنایا ہے۔ کانگریس نے اپنے آفیشیل ٹوئٹر ہینڈل سے ایک پوسٹ کیا ہے جس میں لکھا ہے کہ ’’آخر کار پی ایم مودی سے رہا نہ گیا۔ ستیہ پال ملک جی نے ملک کے سامنے ان کی قلعی کھول دی۔ اب سی بی آئی نے ملک جی کو بلایا ہے۔ یہ تو ہونا ہی تھا۔ ایک چیز اور ہوگی... ’گودی میڈیا‘ اب بھی خاموش رہے گا، لکھ کر رکھ لیجیے۔‘‘

واضح رہے کہ ستیہ پال ملک نے اپنے ایک بیان میں دعویٰ کیا تھا کہ آر ایس ایس لیڈر سے متعلق ایک فائل کو کلیئر کرنے کے لیے انھیں مبینہ طور پر 300 کروڑ روپے کی رشوت پیش کی گئی تھی۔ اس کے بعد ایجنسی نے ایک کیس درج کیا تھا۔ اس معاملے کو لے کر ستیہ پال ملک سے گزشتہ سال اکتوبر میں بھی پوچھ تاچھ کی گئی تھی۔