سابق وزیر اعلیٰ ویربھدر کی آخری رسومات 10 جولائی کو، ہماچل میں 3 روزہ غم کا اعلان

شملہ: ہماچل پردیش کے سابق وزیر اعلی ویربھدر سنگھ کی آخری رسومات 10 جولائی کو رام پور میں اداکی جائے گی۔ اس سے قبل آج جمعرات کو ان کا جسد خاکی ہولی لاج میں پورے دن دیکھنے کے لئے رکھا جائے گا۔ 9 جولائی بروز جمعہ کو جسد خاکی صبح سے ایک بجے تک راجیو بھون کانگریس میں درشن کے لئے رکھا جائے گا۔ دو پہر ایک بجے جسد خاکی کو لے کر کنبہ رام پورکے لئے روانہ ہوگا اور شام کے چھ بجےرام پور پہنچے گا۔ ہفتہ 10 جولائی کو پدم پیلیس رام پورمیں آٹھ سے دوپہر دو بجے تک جسد خاکی کو دیدارکے لئے رکھا جائے گا۔ آخری رسومات سہ پہر 3 بجے رام پور میں ہوگی۔

ہماچل پردیش کے چھ بار وزیر اعلی اورسابق مرکزی وزیر رہے ویربھدر سنگھ کا آج صبح سویرے انتقال ہوگیا۔ معلومات کے مطابق ویربھدر کا انتقال صبح 3.40 بجے ہوا۔ دوبارہ کورونا مثبت آںے کے بعد وہ شملہ کے آئی جی ایم سی اسپتال میں زیرعلاج تھے۔ سینئر کانگریس لیڈر کے انتقال سے ریاست میں سوگ کی لہر دوڑ گئی ہے۔ سابق وزیر اعلی ویربھدر سنگھ کی موت کے بعد ہماچل پردیش حکومت نے ریاست میں تین دن کے ریاستی سوگ کا اعلان کیا ہے۔

اس درمیان ہماچل پردیش کے وزیراعلیٰ جے رام ٹھاکر نے سابق وزیراعلیٰ ویربھدر سنگھ کے انتقال پر اظہارغم کیا اور مرحوم کے اعزاز میں تین روزہ سرکاری سوگ کا اعلان کیا ہے۔ وزیراعظم نریندرمودی نے بھی سابق وزیر اعلی ویربھدر سنگھ کے انتقال پر غم کا اظہارکیا ہے، پی ایم مودی نے ٹوئٹ کیا کہ ویربھدر سنگھ نے اپنے سیاسی سفر میں تجربہ سے ہماچل پردیش کی ترقی میں اہم کردار ادا کیا ہے۔ ان کے انتقال سے افسوس ہوا ہے، خدا مرحوم کو سکون عطا کرے۔ مرکزی وزیر داخلہ امت شاہ نے بھی ویربھدر سنگھ کے انتقال پر غم کا اظہار کیا ہے۔ امت شاہ نے ٹوئٹ کیا کہ ویربھدر سنگھ کی موت کے افسوس ناک خبر ملی، خدا ان کی روح کو سکون عطا کرے۔ پسماندگان اور حامیوں کے تئیں تعزیت کا اظہار کیا۔