نوتشکیل ’رام مندر ٹرسٹ‘ کی پہلی میٹنگ آئندہ 10 دنوں میں!

پی ایم نریندر مودی کے ذریعہ لوک سبھا میں رام مندر ٹرسٹ تشکیل دینے کے اعلان کے ساتھ ہی عظیم الشان رام مندر تعمیر کی سرگرمیاں بھی تیز ہو گئی ہیں۔ ’شری رام جنم بھومی تیرتھ چھیتر‘ کے نام سے بننے والے اس ٹرسٹ کی تشکیل میں سادھو سنتوں کو اہمیت دی گئی ہے۔ اس ٹرسٹ میں نامزد رکن سوامی گووند دیو گری جی نے ایک ہندی میڈیا سے بات چیت کے دوران کہا کہ ایک مہینے قبل وی ایچ پی کے قومی صدر دفتر سے فون آیا تھا کہ اگر آپ کا انتخاب ہوا تو آپ انکار تو نہیں کریں گے؟ اس کے بعد اس سلسلے میں کسی سے بات نہیں ہوئی اور میڈیا سے پتہ چلا کہ وہ اس ٹرسٹ کے رکن بنائے گئے ہیں۔

سوامی گووند دیو گری جی نے ٹرسٹ کے تعلق سے ضروری باتوں کا تذکرہ کرتے ہوئے ’دینک بھاسکر‘ کو بتایا کہ ’’پہلی ترجیح یہ ہے کہ سبھی نامزد رکن مل کر ان 5 اراکین کا انتخاب کریں جن کی جگہ ابھی ٹرسٹ میں خالی رکھی گئی ہے۔ اس کے لیے اہل اشخاص کے ناموں پر غور کیا جائے گا۔ ممکن ہے آئندہ 10 دنوں میں پہلی میٹنگ منعقد ہو، اور اس کے بعد ہی ٹرسٹ کے طریقہ کار اور اراکین کے کردار کے بارے میں چیزیں واضح ہو سکیں گی۔‘‘

رام مندر تعمیر کا کام کب تک شروع ہو سکتا ہے؟ اس سوال کے جواب میں سوامی گووند دیو گری نے کہا کہ ’’ماگھ میلہ میں سنت سماج کی میٹنگوں اور سمیلن میں رام نومی اور اکشے ترتیا دو تاریخوں پر بات کی گئی ہے، لیکن ابھی یہ کہنا مشکل ہوگا کہ اتنی جلدی یہ سب کیسے ممکن ہو پائے گا۔ ٹرسٹ کی پہلی میٹنگ کے بعد ہی اس پر کچھ کہنے کی حالت بن سکے گی۔‘‘

قابل ذکر ہے کہ پی ایم نریندر مودی اور امت شاہ اپنے کچھ بیانوں میں کہہ چکے ہیں کہ بہت جلد عظیم الشان رام مندر کی تعمیر کا کام شروع ہوگا۔ اس کے لیے سپریم کورٹ کی ہدایت کے مطابق سب سے پہلے رام مندر ٹرسٹ بنائے جانے کا حکم دیا تھا جو کہ اب بن چکا ہے۔ اس لیے امید کی جا رہی ہے کہ ’شری رام جنم بھومی تیرتھ چھیتر‘ کی پہلی میٹنگ کے بعد تعمیری کام شروع ہونے میں بہت زیادہ دیر نہیں لگے گی۔