فیروزآباد: احتجاج متاثرین سے اکھلیش کی ملاقات، ہر ممکن مدد کی یقین دہانی

لکھنؤ: سماج وادی پارٹی سربراہ و سابق وزیر اعلی اکھلیش یادو نے فیروزآباد میں شہریت (ترمیمی) قانون کے خلاف احتجاج میں ہلاک ہونے والے افراد کے اہل خانہ سے سنیچر کو ملاقات کر کے ان کے ساتھ ہمدردی کا اظہا ر کرتے ہوئے انہیں ہر ممکن تعاون کی یقین دہانی کراتے ہوئے کہ ایس پی کی حکومت بنتے ہی مظاہرین کے خلاف درج کیے گئے سبھی مقدمے واپس لئے جائیں گے۔

یو پی میں شہریت (ترمیمی) قانون کے خلاف ہونے والے احتجاج کے دوران پھوٹے تشدد میں تقریباً 23 افراد کی موت ہوئی تھی جن میں سے سب سے زیادہ 6 اموات فیروزآباد میں ہی ہوئی ہیں۔ سنیچر کو ایس پی سربراہ اکھلیش یادو احتجاج متأثرین کے اہل خانہ سے ملاقات کرنے فیروزآباد پہنچے تھے اور مالی تعاون کے طور پر اہل خانہ کو 3۔3 لاکھ روپئے کا چیک سونپا۔

فیروزآباد میں نینی گلاس فیکٹری کے نزدیک ارمان ولد امین کے گھر سبھی پانچ مہلوکین کے اہل خانہ کو بلا کر اکھلیش نے ان سے ملاقات کی اور ان کی ڈھارس بندھاتے ہوئے ہر قسم کی قانونی مدد کی یقین دہانی کرائی۔ متأثرین کے اہل خانہ سے ملاقات کے دوران اکھلیش یادو نے کہا کہ ریاست میں ایس پی کی حکومت بننے کے بعد مظاہرین کے خلاف درج کیے گئے سبھی مقدمے واپس لئے جائیں گے۔

ایس پی سربراہ نے سی اے اے/این آر سی کو غریب عوام مخالف قرار دیتے ہوئے کہا کہ ملک میں کتنے ہی غریب کنبے ایسے ہیں جن کے پاس ضروری دستاویزات نہیں ہیں وہ اس کے لئے دستاویز کہاں سے لائیں گے۔ سماجو ادی پارٹی ایسے قانون کی مخالفت جاری رکھے گی۔ اس سے قبل ایس پی سربراہ اکھلیش یادو جمعہ کو قنوج میں ہونے والے بس حادثے پر گہرے رنج و غم کا اظہار کرتےہوئے مہلوکین کے اہل خانہ کو دس۔دس لاکھ روپئے مالی تعاون کے طور پر دینے کا مطالبہ کیا۔

ایس پی سربراہ نے بی جے پی پر سطحی سیاست کرنے کا الزام لگاتے ہوئے کہا کہ اگر ان کے میعاد کار میں بنایا گیا فائر اسٹیشن بند نہیں کیا گیا ہوتا تو اس بات کے قوی امکانات تھے کہ اس حادثے میں کئی لوگوں کی جانیں بچا ئی جاسکتی تھیں کیوں کہ وہاں سے موقع واردات پر پہنچنے میں فائر بریگیڈ کی گاڑیاں صرف دس منٹ میں پہنچ جاتیں۔ انہوں نے کہا کہ بی جے پی نے سطحی سیاست کی وجہ ان کے میعاد کار میں بنائے گئے فائر اسٹیشن کو بند کردیا تھا۔

انہوں نے نظم ونسق پر سوال اٹھاتے ہوئے کہا کہ جے این یو میں بی جے پی کے غنڈوں نے گھس کر طلبہ و اساتذہ کے ساتھ مار پیٹ کی۔ پولیس ان پر کارروائی نہیں کرتی ہے کیونکہ ان کا تعلق بی جے پی سے تھا۔سی اے اے پر تبصرہ کرتے ہوئے انہوں نے کہا کہ اس کے ذریعہ بی جے پی عوام کو مسائل میں الجھانا چاہتی ہے۔ بی جے پی نے اپنے میعاد کار میں کوئی ایسا کام نہیں کیا ہے جو عوام کے مفاد میں ہو۔