شدید ترین گرمی کا اندیشہ لاحق، پی ایم مودی نے کی اعلیٰ سطحی میٹنگ، اسپتالوں و محکمہ موسمیات کو دی گئیں اہم ہدایات

ہندوستان کی کچھ ریاستوں میں ابھی سے گرمی نے ریکارڈ توڑنا شروع کر دیا ہے۔ ایسے میں آئندہ دنوں میں شدید ترین گرمی کا اندیشہ لاحق ہو گیا ہے۔ اس کے پیش نظر وزیر اعظم نریندر مودی پیر کے روز اعلیٰ سطحی میٹنگ کر موجودہ حالات کا جائزہ لیا۔ میٹنگ میں کابینہ سکریٹری اور مرکزی داخلہ سکریٹری کے علاوہ دیگر اعلیٰ افسران بھی موجود تھے۔ میٹنگ میں وزیر اعظم کو مانسون، گیہوں اور دیگر ربیع فصلوں پر موسم کے اثرات اور دیگر امور کے بارے میں جانکاریاں دی گئیں۔

میٹنگ کے دوران وزیر اعظم نریندر مودی نے اسپتالوں اور محکمہ موسمیات سے متعلق کچھ اہم ہدایات بھی دیں۔ انھوں نے ہدایت دی کہ گرمی میں لگنے والی آگ کے پیش نظر سبھی اسپتالوں میں آگ کا آڈٹ کیا جائے۔ اس کے علاوہ وزیر اعظم دفتر نے جانکاری دیتے ہوئے کہا کہ وزیر اعظم مودی نے محکمہ موسمیات سے روزانہ موسم کی پیشین گوئی اس طرح سے جاری کرنے کو کہا ہے جسے آسانی سے سمجھا اور نشر کیا جا سکے۔ اس بات پر بھی تبادلہ خیال ہوا کہ ٹی وی نیوز چینل اور ایف ایم ریڈیو روزانہ موسم کی پیشین گوئی کو سمجھانے کے لیے روزانہ کچھ منٹ خرچ کر سکتے ہیں۔

وزیر اعظم نے کہا کہ میٹنگ میں آبپاشی کے لیے پانی کی فراہمی، چارہ اور پینے کے پانی کی نگرانی کے لیے چل رہی کوششوں وغیرہ کا بھی جائزہ لیا گیا۔ اس کے علاوہ وزیر اعظم کو ضروری فراہمی کی دستیابی اور ایمرجنسی حالات کے لیے تیاریوں کے ضمن میں ریاستوں و اسپتالوں کے بنیادی ڈھانچے کی تیاریوں کے بارے میں جانکاری دی گئی۔ وزیر اعظم نے جنگل کی آگ سے نمٹنے کے لیے ایک مربوط کوشش کی ضرورت پر زور دیا اور اسے روکنے کی کوششوں کے لیے سسٹم پر مبنی تبدیلیوں کی ضرورت ظاہر کی۔