کسان یومِ جمہوریہ پریڈ: کارگل فتح کرنے والا سابق فوجی ’ٹریکٹر پریڈ‘ کا ہوگا کمانڈر!

زرعی قوانین کے خلاف کسان مظاہرین یوم جمہوریہ ٹریکٹر پریڈ کے لیے پوری طرح تیار ہو چکے ہیں اور کسان تنظیموں کے دعویٰ کے مطابق دہلی کی سڑکوں پر 2 لاکھ ٹریکٹر قطار بند پریڈ کرتے ہوئے نظر آئیں گے۔ اس درمیان ایسی خبریں سامنے آ رہی ہیں کہ ٹریکٹر پریڈ میں سابق فوجی جوان رام ناتھ سنگھ سکروار بھی شریک ہوں گے۔ ہندی نیوز پورٹل ’جن ستّا‘ پر شائع ایک رپورٹ کے مطابق رام ناتھ سنگھ سکروار کارگل کی لڑائی میں شامل ہو چکے ہیں اور ملک کی شان بڑھانے کے بعد اب وہ کسانوں کی حمایت میں ٹریکٹر ریلی میں شریک ہوں گے۔

53 سالہ سکروار کے بارے میں بتایا جاتا ہے کہ وہ سابق رڈار ٹیکنیشین رہ چکے ہیں اور کئی دنوں سے یوم جمہوریہ پر ہونے والے ٹریکٹر پریڈ کے لیے کسانوں کو ٹریننگ دے رہے ہیں۔ قابل ذکر بات یہ بھی ہے کہ رام ناتھ سکروار چیلا بارڈر سے نکلنے والی یومِ جمہوریہ ٹریکٹر پریڈ کے ’کمانڈر‘ بھی رہیں گے۔ گزشتہ کئی دنوں سے رام ناتھ نوجوانوں کو ٹریننگ دے رہے ہیں کہ اگر 26 جنوری کے دن واٹر کینن یا آنسو گیس کا استعمال کیا گیا تو اس کا مقابلہ کس طرح کرنا ہے۔ اس کے لیے 6 لوگوں کی ’کوئک رسپانس ٹیم‘ (کیو آر ٹی) بنائی گئی ہے۔ ملٹری اسٹائل میں اس ٹیم کو ’کوڈ ورڈس‘ بھی دیے گئے ہیں۔ یہ ٹیم پریڈ کمانڈر سے ملے سیکرٹ سگنل پر کام کرے گی۔

میڈیا سے بات چیت کےد وران رام ناتھ سنگھ سکروار نے کہا کہ ’’مرکزی حکومت کسانوں کی بات نہیں سمجھ رہی ہے۔ اب ہم دہلی میں ایک تاریخی پریڈ کریں گے۔ کسانوں کو پوری طرح ڈسپلن میں رہنے کی ٹریننگ دی جا رہی ہے۔ ہزاروں لوگ سڑک کی ایک جانب مارچ کریں گے اور ٹریکٹر طویل قطاروں میں چلیں گے۔ 25 نوجوان کسانوں کو الگ الگ طرح کے ٹاسک دیے گئے ہیں۔ میں اس پریڈ کی نگرانی کچھ سینئر اراکین کے ساتھ کروں گا۔‘‘

یومِ جمہوریہ ٹریکٹر پریڈ کو لے کر کی گئی تیاریوں سے متعلق سابق فوجی سکروار بتاتے ہیں کہ ’’ہم کوئی چانس نہیں لینا چاہتے۔ اگر پولس نے واٹر کینن یا آنسو گیس کا استعمال کیا تو کیو آر ٹی حرکت میں آئے گی۔ اس ٹیم کی کوشش ہوگی کہ وہ بزرگ کسان اور خواتین کو زخمی ہونے سے بچائیں۔ سبھی نوجوان کسانوں کو سختی سے ہدایت دی گئی ہے کہ وہ صبر رکھیں اور امن قائم رکھنے میں مدد کریں۔‘‘