یوگی راج میں پھر ایک کسان نے کی خودکشی، بجلی بل دیکھ کر تھا پریشان!

علی گڑھ ضلع میں ایک 50 سالہ کسان نے خودکشی کر لی ہے کیونکہ انھیں 1.5 لاکھ روپے کا بجلی بل تھما دیا گیا تھا۔ جب کسان نے محکمہ بجلی کے افسران سے کہا کہ ان کے پاس ادائیگی کرنے کے لیے اتنے پیسے نہیں ہیں، تو ایک افسر نے مبینہ طور پر انھیں تھپڑ مار دیا۔ متاثرہ کے اہل خانہ کے مطابق یہ واقعہ اترولی تحصیل کے سنیرا گاؤں کا ہے۔ یہاں کچھ افسران رام جی لال کے گھر پر آ پہنچے اور انھیں 1 لاکھ 50 ہزار روپے کا بجلی بل تھما دیا۔

متاثرہ کے ذریعہ یہ کہے جانے پر کہ بل کی ادائیگی کرنے کے لیے ان کے پاس اتنے پیسے نہیں ہیں، تو محکمہ صنعت کے ملازمین نے مبینہ طور پر ان کے اہل خانہ کے سامنے ہی انھیں تھپڑ مار دیا۔ گھر والوں نے کہا کہ رام جی لال نے انھیں بل میں سدھار کرنے کی بات کہی، لیکن کوئی فائدہ نہیں ہوا۔

کسان کے بھتیجے رام چرن اور فیملی کے دیگر اراکین نے پولس تھانہ برلا میں درج کرائی گئی اپنی شکایت میں الزام عائد کیا ہے کہ بجلی بل میں 150 روپے کی رقم کو غلط طریقے سے 150000 روپے دکھایا گیا تھا۔ جب ساری کوششیں ناکام ہو گئیں، تو تھک ہار کر انھوں نے پھانسی کا پھندا لگا کر خودکشی کر لی۔

مقامی لوگوں نے بجلی محکمہ کے دفتر کے سامنے لاش رکھ کر واقعہ کے خلاف احتجاج کیا اور ایس ڈی او اور جونیئر انجینئر کے خلاف معاملہ درج ہونے تک آخری رسومات ادا کرنے سے بھی انکار کر دیا، جنھوں نے مبینہ طور پر متاثرہ کے گھر جا کر ان کے ساتھ بدسلوکی کی تھی۔ پولس نے مظاہرین کو یقین دلایا کہ ضروری کارروائی کے بعد کوئی قدم اٹھایا جائے گا۔ اترولی کے ایس ڈی ایم پنکج کمار نے کہا کہ قصوروار پائے جانے والوں کے خلاف ضروری کارروائی کی جائے گی اور ابتدائی جانچ کے بعد ان کے خلاف معاملہ بھی درج کیا جائے گا۔