وزیر اعظم مودی کی بزدلی کے سبب چین ہماری سرزمین پر قابض : راہل گاندھی

لداخ میں چین کے ساتھ تنازعہ کے حوالہ سے کانگریس رہنما راہل گاندھی نے ایک مرتبہ پر وزیر اعظم نریندر مودی کو ہدف تنقید بنایا ہے۔ راہل گاندھی نے کہا ہے کہ ملک وزیر اعظم نریندر مودی کے سوا ہر شہری کو ہندوستانی فوج کی صلاحیت پر بھروسہ ہے۔

چین سے تنازع کے معاملہ پر حکومت پر لگاتار حملہ بولنے والے کانگریس رہنما راہل گاندھی نے اتوار کو ایک بار پھر نشانہ لگایا۔ حکومت پر حملہ بولتے ہوئے راہل گاندھی نے کہا کہ حکومت ہند لداخ معاملہ پر چینی ارادوں سے ڈر گئی ہے۔ راہل گاندھی نے کہا کہ سبھی کو فوج کی صلاحیتوں پر یقین ہے صرف وزیر اعظم مودی کو ہی نہیں ہے۔

راہل گاندھی نے اپنے ٹوئٹ میں لکھا، ’’ہر کوئی ہندوستانی فوج کی صلاحیت اور بہادر پر یقین رکھتا ہے، سوا وزیر اعظم کے، جس کی بزدلی کی وجہ سے چین ہماری سرزمین پر قابض ہو گیا۔ ان کے جھوٹ کی وجہ سے وہ (سرزمین) اسی کے پاس رہے گی۔‘‘

اس سے پہلے راہل گاندھی نے جمعہ کے روز ایک ٹوئٹ کر کے مودی حکومت پر نشانہ لگاتے ہوئے کہا کہ حکومت ہند چین سے ڈری ہوئی ہے۔ زمین پر موجود ثبوت اس طرف اشارہ کرتے ہیں کہ چینی خود کو تیار کر رہا ہے اور اپنی پوزیشن مضبوط کر رہا ہے۔ وزیر اعظم کی نجی طور پر ہمت کی کمی اور میڈیا کی خاموشی کی وجہ سے ہندوستان کو اس کی بڑی قیمت ادا کرنی پڑے گی۔