کچھ سرمایہ داروں سے تعلقات نے حکومت کو اندھا کر دیا! پون کھیڑا کا رام دیو کے حوالہ سے پی ایم مودی پر حملہ

نئی دہلی: کانگریس پارٹی نے وزیر اعظم نریندر مودی پر الزام عائد کیا ہے کہ ان کے سرمایہ داروں سے گہرے تعلقات ہیں، جس کی وجہ سے وہ ملک کا نفع و نقصان سمجھ پانے سے قاصر ہیں۔ کانگریس نے یہ حملہ رام دیو کی کمپنی پتنجلی کی ملکیت والی روچی سویا کے بے تحاشہ منافع کے حوالہ سے کیا ہے۔ روچی سویا 2017 میں دیوالیا ہونے کی کگار پر تھی اور اسے نقصان ہو رہا تھا۔ لیکن جیسے ہی اسے رام دیو کی پتنجلی نے خریدا اسے 680 کروڑ روپے سے زیادہ کا منافع ہوا۔

کانگریس کے ترجمان پون کھیڑا کی طرف سے جاری کردہ پریس بیان میں کہا گیا کہ بزرگ کہتے تھے کہ جذباتی رشتے انسان کو اندھا بنا دیتے ہیں، پھر وہ صحیح، غلط، اچھا، برا، بھلا کچھ دیکھ نہیں پاتا۔ ایسا ہی کچھ موجودہ حکومت کے ساتھ بھی ہے۔ حکومت کا کچھ سرمایہ داروں سے اتنا جذباتی رشتہ ہے کہ پی ایم مودی یہ دیکھ ہی نہیں پا رہے ہیں کہ ملک کا کیا نقصان ہو رہا ہے۔

پون کھیڑا نے کہا کہ یہ صرف پیسے والے لوگ ہیں جنہیں نا تو تاجر کہا جا سکتا ہے اور نا ہی صنعت کار۔ کیونکہ کروڑوں صنعت کار اور تاجر محنت کرتے ہوئے اس ملک کی معیشت کو مستحکم بناتے ہیں۔ اگر ان چند سرمایہ داروں کو تاجر یا صنعت کار کہا گیا تو یہ ان سبھی محنت کرنے والوں کی بے حرمتی ہوگی۔

روچی سویا کے تعلق سے بات کرتے ہوئے پون کھیڑا نے کہا کہ 2017 میں اس کمپنی کی دیولیا ہونے کی عرضی این سی ایل ٹی (نیشنل کمپنی لا ٹریبیونل) کی جانب سے قبول کر لی گئی تھی۔ اس کمپنی نے مختلف بینکوں سے 12 ہزار 146 کروڑ روپے کا قرض لیا تھا۔ جس میں سے ایس بی آئی کو اس کے 1816 کروڑ کی جگہ صرف 883 کروڑ روپے ہی حاصل ہو پائے۔ دیوالیا ہونے کے بعد نیلامی میں دو کمپنوں نے بولی لگائی ایک اڈانی کی کمپنی اور دوسری رام دیو کی۔ آخر کار پتنجلی نے اسے 4350 کروڑ روپے میں اپنی تحویل میں لے لیا۔

پون کھیڑا نے کہا کہ ایک ایسی کمپنی جس نے ملک کے بینکوں سے پیسہ قرض لیا اور ڈوب گئی، اس کو خریدنے میں 2100-2200 کروڑ روپے جو خرچ ہوئے وہ کس کا سرمایہ تھا؟ ظاہر سی بات ہے وہ بینکوں میں رکھا گیا آپ کا اور ہمارا پیسہ تھا۔ انہوں نے کہا کہ ایسے ماحول میں جب این پی اے کے اعداد و شمار حیران کر دیتے ہیں، کوئی ایس بی آئی کو دو ہزار کروڑ سے زیادہ کی چپت لگا جاتا ہے!

پون کھیڑا نے مزید کہا کہ کہ روچی سویا کی مالیت 2019 میں 3450 کروڑ روپے تھی، لیکن اس وقت اس کی مالیت 35360 کروڑ روپے ہوگئی ہے، یہ حیران کن ہے۔ انہوں نے پوچھا کہ آخر پتنجلی کا بزنس ماڈل کیا ہے جو 5 مہینے میں روچی سویا کا شیئر 17 روپے سے بڑھ کر 1535 روپے کا ہو جاتا ہے۔ وزیر خزانہ ملک کے لئے کچھ نہیں کر پا رہیں تو کیوں نا رام دیو کو ہی وزیر خزانہ بنا دیا جائے، شاید ملک کا کچھ بھلا ہو جائے!

انہوں نے کہا کہ رام دیو سے وزیر اعظم مودی کے تعلقات ہیں، اس لئے ایس بی آئی نے ہمارا اور آپ کے قرض کا پیسہ رام دیو کو دے دیا۔ تمام کارروائیاں پہلے ہی ہو گئی تھیں اور اس کے بعد روچی سویا کا انتظام سنبھالا گیا۔ ایک ڈوبی ہوئی کمپنی کو خریدنے کے لئے ایس بی آئی نے لون کیوں دیا، اسے بھی اس کا جواب دینا چاہیے اور اگر کسی نے اس کے لئے دباؤ بنایا تو بینک کو اس کا نام ظاہر کرنا چاہیے تاکہ ملک کے عوام حقیقت جان سکیں۔