مدھیہ پردیش: عوام کو لگا مہنگائی کا ایک اور جھٹکا، کمل ناتھ نے کہا ’یہی بی جے پی کی حقیقت ہے‘

مدھیہ پردیش میں ڈیزل-پٹرول کی بڑھتی قیمتوں کے درمیان عام صارفین کو ایک اور جھٹکا لگا ہے۔ دراصل بجلی کی شرحوں میں اضافہ کر دیا گیا ہے اور یہ نئی شرحیں سای ماہ سے نافذ ہونے والی ہیں۔ بجلی کی شرحوں میں ہوئے اضافہ پر کانگریس نے شیوراج حکومت پر زوردار حملہ کیا ہے۔

ریاستی بجلی ریگولیٹری کمیشن نے بجلی کی شرحوں میں 2.64 فیصد کا اضافہ کرنے کا حکم جاری کر دیا ہے، نئی شرحیں اسی ماہ کی 8 تاریخ سے نافذ ہو جائیں گی۔ بجلی کی شرحوں میں اضافہ کا بڑا اثر گھریلو صارفین پر پڑنے والا ہے۔ ساتھ ہی صنعتی بجلی کی شرحیں بھی بڑھائی گئی ہیں۔ بجلی کی نئی شرح میں گھریلو بجلی کی شرحیں سب سے زیادہ بڑھائی گئی ہیں۔ 50 یونٹ تک 3.2 فیصد، جب کہ 100 یونٹ تک بجلی کا خرچ کرنے والوں کی بجلی شرحوں میں 3.7 فیصد کا اضافہ کیا گیا ہے۔

بجلی شرحوں میں ہوئے اضافہ پر کانگریس ریاستی صدر کمل ناتھ نے ریاستی حکومت کو تنقید کا نشانہ بنایا ہے۔ انھوں نے کہا کہ عوام پہلے سے ہی پٹرول، ڈیزل، رسوئی گیس، خوردنی اشیاء کی بڑھتی قیمتوں سے پریشان ہے، اور اب ریاست میں بجلی بھی مہنگی کر دی گئی ہے۔ ریاست میں بجلی کی شرحوں میں اوسطاً 2.64 فیصد کا اضافہ کیا گیا ہے۔ انھوں نے مزید کہا کہ ایک طرف عوام مہنگائی سے راحت کا مطالبہ کر رہی ہے اور دوسری طرف بی جے پی حکومت لگاتار مہنگائی بڑھا کر عوام کی کمر توڑنے کا کام کر رہی ہے۔ ہماری حکومت نے ریاست میں صارفین کو سستی بجلی دے کر ایک انقلابی قدم اٹھایا تھا لیکن جب سے ریاست میں شیوراج حکومت آئی ہے، عام صارفین کو ہزاروں روپے کے بل تھمائے جا رہے ہیں اور اب بجلی شرحوں میں بھی اضافہ کر دیا گیا ہے۔

کمل ناتھ نے بی جے پی حکومت کے مہنگائی کم کرنے والے نعروں کا تذکرہ کرتے ہوئے کہا کہ ’’جو لوگ انتخاب کے قبل ’ابکی بار مہنگائی سے راحت والی سرکار‘ کا نعرہ دیتے تھے، یہ ان کی حقیقت اور سچائی ہے۔‘‘