انتخابی بانڈ نے بی جے پی کا بینڈ بجا دیا ہے:اکھیلیش یادو

سماج وادی پارٹی نے لوک سبھا انتخابات میں قلعہ فتح کرنے کے لیے کمر کس لی ہے۔ جیسے جیسے انتخابات کی تاریخیں قریب آ رہی ہیں، رہنماؤں کی ریلیوں میں اضافہ ہوتا جا رہا ہے۔ سماجوادی پارٹی صدر اور یوپی کے سابق وزیر اعلی اکھیلیش یادو نے بدھ یعنی17 اپریل کو مراد آباد میں ایک انتخابی ریلی سے خطاب کیا۔ اس دوران اکھلیش یادو نے کئی مسائل پر بی جے پی کو گھیرنے کا کام کیا۔ اکھیلیش یادو نے ایس پی امیدوار روچی ویرا کی حمایت میں ووٹ ڈالنے کی اپیل کی ۔

لوک سبھا انتخابات کو لے کر یوپی میں اکھلیش یادو کی زبردست ریلیوں کا سلسلہ جاری ہے۔ اکھیلیش یادو نے مراد آباد میں ایک جلسہ عام سے خطاب کیا۔ اس دوران اکھیلیش یادو نے بی جے پی پر سخت حملہ کیا۔ اکھیلیش یادو نے بی جے پی کے 400 پار کے نعرے پر طنز کرتے ہوئے کہا، 'جب بی جے پی والے کہتے ہیں 400 پار اور ان کے رہنماؤں کے بیانات آتے ہیں کہ یہ لوگ آئین کو بدلنا چاہتے ہیں تو کیا ایسا ممکن ہے۔ انہوں نے کہا کہ دنیا میں اگر کوئی سب سے خوبصورت جمہوریت ہے تو وہ ہندوستان کی ہے۔ انہوں نے یہ بھی کہا کہ اگر حکومت بھیم راؤ امبیڈکر کے دیے گئے آئین پر عمل کرتی ہے تو کسی ذات یا مذہب کے لوگوں کے ساتھ کوئی امتیاز نہیں ہوگا۔

الیکٹورل بانڈ کے معاملے پر اکھیلیش نے بی جے پی کو گھیر ااور کہا، 'انتخابی بانڈ نے بھارتیہ جنتا پارٹی کو برباد کر دیا ہے۔ کوئی سوچ بھی نہیں سکتا تھا کہ ایک سیاسی جماعت سیاست میں اتنا چندہ اکٹھا کر سکتی ہے۔ انہوں نے یوپی میں پیپر لیک معاملے پر یوگی حکومت کو نشانہ بنایا ۔ اکھلیش نے کہا کہ جس طرح سے نوکری کے سوال پر پیپر لیک ہوئے ہیں، کیا کوئی نوجوان سوچ سکتا تھا کہ یہ پیپر لیک ہوں گے؟ ان کا مزید کہنا تھا کہ اس حکومت  کے دور میں ہر پرچہ لیک ہوا، تمام امتحانات کے تمام پرچے لیک ہوئے ۔ اس حکومت میں اب تک 10 پیپر لیک ہو چکے ہیں۔

اکھیلیش یادو نے کہا، "مجھے بتائیں کہ کیا دہلی اور جھارکھنڈ کے وزیر اعلیٰ کے خلاف جھوٹے مقدمے درج کیے گئے یا نہیں؟ اور کیا ہماری پارٹی کے رہنما محمد اعظم خان صاحب کے خلاف جھوٹے مقدمے درج کیے گئے یا نہیں؟" اکھلیش یادو نے کہا کہ سماج وادی پارٹی نے انڈیا الائنس کو بچانے کا کام کیا ہے اور انڈیا الائنس بھارتیہ جنتا پارٹی کا صفایا کرنے جا رہا ہے۔‘‘

واضح رہے کہ اس سے قبل مراد آباد کے مغل پورہ علاقے کے جی آئی سی گراؤنڈ میں اکھیلیش یادو کی میٹنگ کی تجویز تھی لیکن خراب موسم کی وجہ سے انتخابی میٹنگ منسوخ کر دی گئی تھی۔ مرادآباد لوک سبھا سیٹ کے لیے پہلے مرحلے میں 19 اپریل یعنی کل ووٹنگ ہوگی۔ روچی ویرا سماج وادی پارٹی کی جانب سے مرادآباد سے الیکشن لڑ رہی ہیں، جب کہ بی ایس پی نے عرفان سیفی پر اعتماد ظاہر کیا ہے۔ وہیں سرویش سنگھ بی جے پی کی طرف سے الیکشن لڑ رہے ہیں۔