الیکشن کمیشن صدارتی انتخاب کی تاریخوں کا اعلان آج کرے گا

نئی دہلی: الیکشن کمیشن آف انڈیا (ای سی آئی) صدارتی انتخاب کے شیڈول کا اعلان جمعرات یعنی آج کرنے جا رہا ہے۔ آئی اے این ایس کے مطابق سہ پہر 3 بجے الیکشن کمیشن کی پریس کانفرنس کے دوران صدارتی انتخاب کی تاریخوں کا اعلان کیا جائے گا۔ خیال رہے کہ صدر رام ناتھ کووند کی مدت کار 24 جولائی کو ختم ہو رہی ہے اور انتخابی عمل اس سے قبل مکمل کرانا لازمی ہے۔

ہندوستان کے صدر کا انتخاب الیکٹورل کالج کے اراکین کے ذریعے کیا جاتا ہے، جس میں پارلیمنٹ کے منتخب اراکین اور تمام قانون ساز اسمبلیوں کے منتخب اراکین شامل ہوتے ہیں۔ نامزد اراکین ووٹ دینے کے اہل نہیں ہوتے۔ اس سے قبل صدارتی انتخاب 17 جولائی 2017 کو ہوئے تھے اور ووٹوں کی گنتی 20 جولائی کو ہوئی تھی۔

غورطلب ہے کہ صدر کے انتخاب کے لیے لوک سبھا، راجیہ سبھا اور اسمبلی کے اراکین مل کر جو الیکٹورل کالج بناتے ہیںاس میں 776 ارکان اور قانون ساز اسمبلی کے 4120 ارکان اسمبلی شامل ہو تے ہے۔

الیکٹورل کالج کی مجموعی ویلیو 1098803 ہے۔ این ڈی اے اکثریت کے ہدف سے چند قدم دور ہے۔ این ڈی اے کو اپنے امیدوار کو صدر بنانے کے لیے بی جے ڈی اور وائی ایس آر سی کی حمایت کی ضرورت ہوگی۔ گزشتہ صدارتی انتخاب میں رام ناتھ کووند کو 65.35 فیصد ووٹ حاصل ہوئے تھے۔ این ڈی اے اس مرتبہ بھی اتنے ہی ووٹ حاصل کرنے کی کوشش کرے گی۔