تلنگانہ کے سابق وزیر اعلیٰ چندرشیکھر راؤ کے خلاف الیکشن کمیشن کا سخت ایکشن، انتخابی تشہیر پر لگی پابندی

الیکشن کمیشن نے بدھ کے روز بھارت راشٹر سمیتی (بی آر ایس) کے سربراہ کے. چندرشیکھر راؤ (کے سی آر) کو کانگریس کے خلاف ان کے قابل اعتراض تبصروں کے لیے 48 گھنٹے تک انتخابی تشہیر کرنے سے روک دیا ہے۔ الیکشن کمیشن کا کہنا ہے کہ 5 اپریل کو سرسیلا میں پریس کانفرنس کے دوران چندرشیکھر راؤ کا تبصرہ مثالی ضابطہ اخلاق کے التزامات اور اس کے گائیڈلائنس کی خلاف ورزی تھی۔

تلنگانہ کے سابق وزیر اعلیٰ کے سی آر کی انتخابی تشہیر پر پابندی بدھ کی شب 8 بجے سے نافذ العمل ہوگی اور جمعہ کی شب 8 بجے تک یہ پابندی ختم ہو جائے گی۔ اپنے حکم میں الیکشن کمیشن نے کہا ہے کہ ’’کمیشن بی آر ایس چیف کے. چندرشیکھر راؤ کو انتخابی ضابطہ اخلاق کی خلاف ورزیوں سے متعلق معاملے میں جاری کیے گئے یا مستقبل میں جاری کیے جانے والے کسی بھی حکم/نوٹس پر منفی اثر ڈالے بغیر، 5 اپریل کو سرسیلا میں ان کی پریس کانفرنس کے دوران ان کے ذریعہ دیے گئے متنازعہ بیان کی سخت مذمت کرتا ہے۔‘‘

الیکشن کمیشن نے اپنے حکم میں یہ بھی لکھا ہے کہ ’’کمیشن ہندوستانی آئین کے آرٹیکل 324 اور اس سلسلے میں اہل دیگر سبھی طاقتوں کے تحت بی آر ایس چیف کے. چندرشیکھر راؤ کو کسی بھی عوامی میٹنگ، عوامی جلوس، عوامی ریلیوں، تقاریب اور انٹرویو منعقد کرنے سے یکم مئی کی شب 8 بجے سے 48 گھنٹوں کے لیے روک لگاتا ہے۔‘‘