شیوسینا کی جنگ: ایکناتھ نے ادھو کو پھر دیا جھٹکا، ٹھانے میونسپل کارپوریشن کے 67 میں سے 66 کونسلر ہوئے باغی

مہاراشٹر میں اقتدار سے بے دخل ہونے کے بعد بھی شیوسینا چیف ادھو ٹھاکرے کو راحت نصیب نہیں ہے۔ ایکناتھ شندے لگاتار شیوسینا پر اپنی گرفت مضبوط کرتے ہوئے نظر آ رہے ہیں۔ تازہ ترین خبروں کے مطابق ٹھانے میونسپل کارپوریشن بھی اب ادھو ٹھاکرے کے ہاتھ سے پھسل گئی ہے۔ یہاں شیوسینا کے 67 میں سے 66 کونسلر باغی ہو گئے ہیں، یعنی ایکناتھ شندے گروپ میں شامل ہو گئے ہیں۔

یہ خبر ادھو ٹھاکرے کے لیے زوردار جھٹکا ہے جو کہ لگاتار ایکناتھ شندے کی شیوسینا کو فرضی بتا رہے ہیں۔ میڈیا رپورٹس کے مطابق ٹھانے میونسپل کارپوریشن کے 66 شیوسینا کونسلر نے وزیر اعلیٰ ایکناتھ شندے سے ان کی رہائش پر ملاقات کی تھی۔ ممبئی میونسپل کارپوریشن کے بعد ٹھانے میونسپل کارپوریشن مہاراشٹر کی دوسری سب سے اہم اور بڑی کارپوریشن ہے۔ اس پر ایکناتھ شندے گروپ کا قبضہ ہونے سے ادھو ٹھاکرے گروپ کے لیے پریشانیاں کافی بڑھ گئی ہیں۔

قابل ذکر ہے کہ ایکناتھ شندے کی ٹھانے میں مضبوط گرفت ہے۔ انھوں نے اپنی سیاست کی شروعات بھی یہیں سے کی تھی۔ انھوں نے 1997 میں ٹھانے میونسپل کارپوریشن انتخاب میں کونسلر کا انتخاب جیتا تھا۔ 2001 میں میونسپل کارپوریشن ایوان میں اپوزیشن کے لیڈر بھی رہے۔ اس کے بعد 2002 میں وہ دوسری بار ٹھانے سے میونسپل کونسلر بنے۔ ایکناتھ شندے 2004 میں ٹھانے اسمبلی سیٹ سے انتخاب جیتے تھے۔ اس کے بعد وہ 2009، 2014 اور 2019 میں ٹھانے کے کوپری پچھپا کھڈی سیٹ سے انتخاب جیتے۔