مغربی بنگال میں ایک بار پھر ای ڈی کی کارروائی، ممتا حکومت کے دو وزراء کے گھر پر چھاپہ

کولکاتا: مغربی بنگال میں ای ڈی ٹیم پر حملے کے بعد جانچ ایجنسی ایک بار پھر حرکت میں آ گئی ہے۔ انفورسمنٹ ڈائریکٹوریٹ (ای ڈی) کی ٹیم نے آج صبح مغربی بنگال کی ممتا بنرجی حکومت کے دو وزراء کے گھروں پر چھاپہ مارا ہے۔ یہ چھاپہ میونسپل کارپوریشن نوکری گھوٹالہ سے متعلق ہے۔

ای ڈی کی ایک ٹیم فائر سروسز کے وزیر سوجیت بوس کے دو مقامات پر پہنچ گئی ہے، جب کہ دوسری ٹیم وزیر تاپس رائے کے مقام پر چھاپہ مار رہی ہے۔ اتنا ہی نہیں ان دو وزراء کے علاوہ بلدیہ کے سابق نائب صدر کے گھر پر بھی ای ڈی کے چھاپے جاری ہیں۔

ای ڈی کی ٹیم حال ہی میں راشن گھوٹالہ معاملے میں ٹی ایم سی لیڈر شاہجہان شیخ کے گھر پر چھاپہ مارنے مغربی بنگال کے سندیش کھالی پہنچی تھی۔ اس دوران گاؤں والوں کے ہجوم نے حملہ کرتے ہوئے ای ڈی افسران کے ساتھ سی آر پی ایف جوانوں کی گاڑیوں کو بھی نشانہ بنایا۔ اس حملے میں ای ڈی کے 3 اہلکار شدید زخمی ہوئے تھے۔

مغربی بنگال میں ای ڈی افسران پر حملے کے بعد جانچ ایجنسی کے کارگزار ڈائریکٹر راہل نوین کولکاتا پہنچ گئے تھے۔ انہوں نے عہدیداروں کے ساتھ میٹنگ کی۔ میٹنگ کے دوران انہوں نے عہدیداروں سے کہا تھا کہ خوفزدہ نہ ہوں، بے خوف ہو کر تحقیقات کریں۔ ذرائع کے مطابق، ای ڈی کے کارگزار ڈائریکٹر نے حکام کو این آئی اے کے ساتھ مل کر کام کرنے کو بھی کہا تھا تاکہ شاہجہان شیخ کے سرحد پار بنگلہ دیش کے ساتھ روابط کی جانچ کی جا سکے۔

ای ڈی حکام کے ساتھ میٹنگ کے بعد کارگزار ڈائریکٹر نے سی اے پی ایف فورسز کے سیکورٹی اہلکاروں کے ساتھ کوآرڈینیشن میٹنگ کی۔ میٹنگ میں، سی اے پی ایف کی تعیناتی کے لیے ایک منصوبہ بنایا گیا، جو چھاپوں کے دوران ای ڈی افسران کے ساتھ ہوں گے۔ قائم مقام ڈائریکٹر راہل نوین نے کہا کہ افسران کے ساتھ ساتھ خواتین پولیس اہلکاروں پر بھی توجہ مرکوز کی جانی چاہیے، تاکہ رکاوٹیں کھڑی کرنے کی کوشش کرنے والی خواتین کو دور کیا جا سکے۔