قومی خبریں

جوہر یونیورسٹی میں کھدائی کے دوران مشینیں برآمد، اعظم خان کی مشکلات میں مزید اضافہ

رامپور پولیس کے ذریعہ جوہر یونیورسٹی میں ایک تلاشی کے دوران اُن کتابوں کا ذخیرہ ملنے کی بات کہی جا رہی ہے جو مدرسہ عالیہ سے غائب ہوئی تھیں، ان کی چوری کا الزام اعظم خان پر لگا تھا۔

تصویر بذریعہ ناظمہ فہیم
تصویر بذریعہ ناظمہ فہیم 

رامپور: اعظم خان ایماندار ہیں یا بدعنوان یہ ان کے خلاف عدالتوں میں چل رہے مقدموں کا فیصلہ آنے کے بعد ہی معلوم ہوگا، لیکن اس وقت ایک کے بعد ایک ان کے خلاف جو رامپور ضلع و پولیس کے افسران کی کارروائی چل رہی ہے، اس نے اعظم خان اور ان کے بیٹے عبداللہ اعظم کی مشکلوں میں اضافہ ضرور کر دیا ہے۔ دو دن قبل پولیس کو یونیورسٹی میں کھدائی کے دوران مبینہ طور پر وہ مشینیں زمین میں دبی ملیں جو شہر کی صفائی کے نام پر سرکاری روپے سے خریدی گئیں تھیں اور ان کا استعمال ذاتی یونیورسٹی میں کیا گیا۔ سماج وادی پارٹی لیڈر اعظم خان پر یہ بھی الزام ہے کہ صوبہ میں حکومت کی تبدیلی کے بعد جب یہ مشینیں تلاشی گئیں تو اپنے گناہ کو چھپانے کے لئے خود اعظم خان نے ان مشینوں کو مٹی کے ڈھیر میں دفن کر دیا۔

Published: undefined

رامپور پولیس کی اعظم خان کے خلاف کارروائی یہیں نہیں رکی بلکہ یونیورسٹی میں ایک اور تلاشی کے دوران اُن کتابوں کا ذخیرہ بھی سامنے آنے کی بات کہی جا رہی ہے جو مدرسہ عالیہ سے غائب ہوئی تھیں۔ ان کی چوری کا الزام بھی اعظم خان پر لگا تھا۔ بتایا جا رہا ہے کہ کتابوں کے اس قیمتی ذخیرے کو رامپور نواب نے جمع کیا تھا اور اس کے لیے انہوں نے بڑی رقم خرچ کی تھی۔ کہا یہ بھی جا رہا ہے کہ یہ بیش قیمت سرمایہ یونیورسٹی کی ایک دیوار کے پیچھے بوروں میں دبی ہوئی ملیں جیسے کوئی ردی فروش اپنی کباڑ کی دکان میں ردی رکھتا ہے۔

Published: undefined

در اصل دو دن قبل رامپور پولیس نے جواریوں کے خلاف کارروائی کرتے ہوئے سالم اور انوار نامی شخص کو گرفتار کیا تھا۔ معاملہ تو جوئے کا تھا مگر اعظم خان اور اکھلیش یادو کی ملاقات کے دوران کھینچی گئی ایک تصویر نے اس معاملہ کو جوہر یونیورسٹی تک پہنچا دیا اور پھر بابا کے بلڈوزر نے اپنا کام دکھا دیا۔ اکھلیش یادو اور اعظم خان کی اس تصویر میں سالم اور انوار صاف دیکھا جا سکتا ہے۔ اس معاملے میں اعظم خان و ان کے بیٹے عبداﷲ اعظم کی مشکلات میں اضافے کے ساتھ ہی اس وقت رامپور کے چیئرمین اظہر احمد خان کی مشکلات میں بھی اضافہ ہوتا نظر آ رہا ہے۔

Published: undefined

دوسری جانب رامپور شہر کی موجودہ چیئرپرسن فاطمہ جبیں نے یونیورسٹی میں ملنے والی مشین کا میونسپلٹی سے کوئی تعلق ہونے کی تردید کی ہے۔ انہوں نے کہا کہ یونیورسٹی میں ملنے والی مشین کا رامپور بلدیہ سے کوئی تعلق نہیں ہے۔ فاطمہ جبیں نے کہا کہ وہ گاڑی بلدیہ کی نہیں ہے۔ رامپور بلدیہ نے اب تک 5 گاڑیاں خریدی تھیں، جس کی خریداری کے تمام ثبوت ہمارے پاس موجود ہیں۔ ہم نے ٹینڈر کا عمل مکمل کر کے خریدی تھیں جو ہمارے پاس تمام گاڑیاں موجود ہیں جو ہماری ورکشاپ میں کھڑی ہیں۔ زمین سے نکالی گئی وہ گاڑی کیسی ہے، ہمارے پاس اس بارے میں کوئی معلومات نہیں کہ یہ کہاں سے آئی ہے۔ ہم نے مینڈیٹ کے تحت جو مشینیں خریدی ہیں، ہمارے پاس دو کمپیکٹر مشینیں، دو سویپنگ مشینیں اور ایک سیور جیٹنگ مشین ہے، جو کہ روڈ سویپنگ مشین کی دیکھ بھال کرتی ہے۔ ہمارے پاس وہ سب کاغدات موجود ہیں جس کے ذریعہ یہ خریدی گئی تھی۔

Published: undefined

رامپور پولیس کپتان کا کہنا ہے کہ سالم اور انوار سے ابھی اور بہت معلومات ملنے والی ہے جس کے لیے ان کی ریمانڈ حاصل کرنے کی تیاری ہے۔ یونیورسٹی سے ملنے والی کتابیں اور مشین کو لے کر جہاں اعظم خان کے حامیوں میں بے چینی ہے، وہیں سیاسی حلقوں میں اس کو لے کر کافی گہما گہمی ہے۔ آگے کیا ہونے والا ہے اس پر تمام ہی لوگوں کی نظریں لگی ہوئی ہیں۔ فی الحال اعظم خان اور ان کے بیٹے عبد اﷲ اعظم کے ساتھ چھ اور لوگوں پر نئے مقدمے لگائے گئے ہیں۔ اعظم خاں اس پوری کارروائی کو سیاسی دشمنی کا نتیجہ بتا رہے ہیں اور سرکاری مشینری کا غلط استعمال بتا رہے ہیں۔

Published: undefined

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔

Published: undefined