کہرے سے پیدا ہوئے مشکل حالات، دہلی و حیدر آباد سمیت کئی ہوائی اڈوں پر فلائٹ آپریشن متاثر

ہندوستان کی کئی ریاستوں میں سردی اور کہرے سے مشکل حالات کا سامنا ہے۔ دہلی میں خراب موسم کے سبب 25 دسمبر کی صبح 6 بجے سے 9 بجے کے درمیان 7 پروازوں کو جئے پور اور ایک پرواز کو احمد آباد ڈائیورٹ کیا گیا۔ اس سلسلے میں دہلی ہوائی اڈہ سے متعلق ذرائع نے تصدیق کی ہے۔ دہلی کے علاوہ حیدر آباد واقع ہوائی اڈہ پر بھی کہرے کے سبب پروازوں کے متاثر ہونے کی خبریں موصول ہو رہی ہیں۔

میڈیا رپورٹس کے مطابق کہرے کی وجہ سے فلائٹ متاثر ہونے کے سبب مسافروں کو شدید پریشانیوں کا سامنا کرنا پڑ رہا ہے۔ کئی مسافروں نے تو سوشل میڈیا پر اپنی مشکلات کو ظاہر کیا ہے۔ پروازوں کی تاخیر اور رخنہ اندازی کی شکایتیں بھی سوشل میڈیا پلیٹ فارمس پر کی گئی ہیں۔ اس درمیان انڈیگو اور اسپائس جیٹ سمیت کچھ ایئرلائنس نے مسافروں کو کم وزیبلٹی (مرئیت) کے بارے میں جانکاری دی۔ اتنا ہی نہیں، دہلی ہوائی اڈہ نے تو مسافروں کے لیے ایک ایڈوائزری جاری کر ان سے پرواز کی جانکاری کے لیے اپنی متعلقہ ایئرلائنز سے رابطہ کرنے کی گزارش بھی کی ہے۔

کہرے کے سبب کولکاتا ایئرپورٹ پر بھی پرواز میں مشکلات درپیش آئی ہیں۔ کولکاتا ایئرپورٹ پر سیزن کے پہلے کہرے نے اتوار کو پرواز متاثر کیا۔ اس سے ایئرلائنس اہلکاروں و مسافروں کو زبردست پریشانی کا سامنا کرنا پڑا۔ ذرائع کے مطابق اتوار کے روز 45 پروازیں دو گھنٹے تاخیر سے روانہ ہوئیں۔ علاوہ ازیں دو بین الاقوامی پروازوں سمیت 6 کو ڈائیورٹ کرنا پڑا۔ نتیجہ کار تاخیر سے دوپہر تک ایئرلائن ٹرانسپورٹیشن متاثر رہا۔ اتوار کی صبح تقریباً 6 بجے کم وزیبلٹی کی وجہ سے پروازوں میں تاخیر ہوئی اور کچھ پروازوں کو ڈائیورٹ بھی کرنا پڑا۔ تقریباً سوا آٹھ بجے کے بعد سے حالات بہتر ہوئے۔ کہرا کولکاتا ایئرپورٹ پر پیر کی صبح بھی دیکھنے کو ملا۔