گجرات میں 5 سالوں کے دوران 2.3 لاکھ کروڑ روپے کا ڈرگس ضبط، پی ایم کی خاموشی حیرت انگیز: کانگریس

کانگریس نے پیر کے روز الزام عائد کیا کہ گجرات میں گزشتہ 5 سالوں کے دوران تقریباً 2.3 لاکھ کروڑ روپے کا ڈرگس ضبط کیا گیا۔ کانگریس کی سینئر لیڈر سپریا شرینیت نے اس سلسلے میں ایک پریس کانفرنس کر وزیر اعظم نریندر مودی اور بی جے پی کو تنقید کا نشانہ بنایا ہے۔ انھوں نے کہا کہ پارٹی نے اقتدار میں آنے کے بعد مرکزی ایجنسیوں سے غیر قانونی کاروبار کی جانچ کرانے کا وعدہ کیا تھا، لیکن بڑی تعداد میں گجرات کے بندرگاہوں سے ڈرگس ضبط ہونے کے باوجود پی ایم مودی کی خاموشی حیرت انگیز ہے۔

میڈیا اہلکاروں سے خطاب کرتے ہوئے سپریا شرینیت نے گجرات کے وزیر داخلہ ہرش سنگھوی کے استعفیٰ یا پھر انھیں برخواست کرنے کا مطالبہ کیا۔ کانگریس نے الزام عائد کیا کہ وہ مبینہ طور پر اس غیر قانونی کاروبار پر لگام لگانے اور اس میں شامل اصل قصورواروں کو پکڑنے میں ناکام رہے ہیں۔ کانگریس لیڈر نے ناراضگی ظاہر کرتے ہوئے کہا کہ ’’گجرات میں مندرا اور پیپاووا جیسے نجی بندرگاہ ملک میں ڈرگس لانے کے لیے داخلہ دروازے بن گئے ہیں۔ مجھے بتایا گیا ہے کہ 2017 اور 2020 کے درمیان گجرات میں 230000 کروڑ روپے کی ڈرگس پکڑی گئیں۔ یہ رقم گجرات کے بجٹ سے بھی بڑا ہے۔‘‘

کانگریس لیڈر نے سوال اٹھایا کہ انفورسمنٹ ڈائریکٹوریٹ (ای ڈی)، مرکزی جانچ بیورو (سی بی آئی) یا نارکوٹکس کنٹرول بیورو (این سی بی) جیسے مرکزی اداروں نے ان دو نجی بندرگاہوں کے مالکان سے پوچھ تاچھ کر کے گہرائی سے جانچ کیوں نہیں کی؟ سپریا شرینیت نے مزید کہا کہ ’’اس کے علاوہ گزشتہ تین ماہ میں سنتھیٹک ڈرگس بنانے والی چار فیکٹریوں کا پردہ فاش کیا گیا تھا۔ یہ ہرش سنگھوی کی ناک کے نیچے ہو رہا ہے، جو اسے روکنے کے لیے کچھ نہیں کر رہے ہیں۔ ہمارا ماننا ہے کہ انھیں اخلاقی بنیاد پر استعفیٰ دے دینا چاہیے۔ اور اگر وہ ایسا نہیں کرتے ہیں تو انھیں برخواست کیا جانا چاہیے۔‘‘

پریس کانفرنس میں کانگریس لیڈر سپریا شرینیت نے جانچ ایجنسیوں کی خاموشی پر بھی سوال اٹھایا اور یہ بھی جاننا چاہا کہ کیا وزیر اعظم نریندر مودی نے نجی بندرگاہ مالکوں سے پوچھا کہ ان کے بندرگاہوں پر ڈرگس کیوں اتر رہا ہے۔ سپریا نے مزید کہا کہ کیا مودی جی نے ڈرگس کی درآمد کو روکنے کے لیے ایسے بندرگاہوں کے لیے گائیڈلائن بنائے؟ اگر نہیں، تو کیوں؟ یہ قومی سیکورٹی کا معاملہ ہے او رکانگریس اس ایشو کو اٹھاتی رہے گی۔ اگر کانگریس گجرات میں برسراقتدار ہوتی ہے تو وہ ای ڈی، سی بی آئی اور دیگر ایجنسیوں کے ذریعہ سے ریاست میں غیر قانونی ڈرگس کے کاروبار کی جانچ کرائے گی۔