حج 2021: قرعہ اندازی کی تاریخوں کا اعلان ابھی نہیں

دہلی اسٹیٹ حج کمیٹی کے دفترمیں حج2021و انتظامی امور کے تعلق سے کل ایک میٹنگ کا انعقاد کیا گیاجس میں حج2021کے تعلق سے تفصیلی بات کی گئی۔ واضح رہے کہ حج کے فارم جمع کرنے کا مرحلہ مکمل ہو چکا ہےاب صرف حکومت سعودیہ اور حکومت ہند کی جانب سے مزید ہدایات کا انتظار ہے جیسے ہی مزید ہدایات موصول ہوں گی اگلا قدم اٹھایا جائے گا۔

میٹنگ میں قرعہ اندازی کے تعلق سے فیصلہ ہوا کہ جب تک سعودی حکومت کا حکومت ہند کے ساتھ معاہدہ نہیں ہوجاتاتب تک کوٹہ مقرر نہیں کیا جاسکتا اور حج کمیٹی کی جانب سے قرعہ اندازی کی تاریخوں کا اعلان نہیں کیا جاسکتا۔

میٹنگ میں مزیدطے پایا کہ جیسے ہی حج کمیٹی آف انڈیا کی جانب سے اس نوعیت کا اعلان آئے گا،فوراً میٹنگ کرکے مناسب فیصلہ کئے جائیں گے۔

میٹنگ میں حج منزل میں COVID-19کے مد نظر حکومت کی جانب سے جاری کردہ گائیڈ لائن کے مطابق عازمین حج کے لیے کیے گئے انتظامات اور ترقیاتی کاموں کا بھی جائزہ لیاگیا۔ حج منزل میں صفائی اور تزئین کاری کے تعلق سے بھی مفصل بات کی گئی اور جدید سہولیات،ترقیات اور اصلاحات لاگو کرنے پر اتفاق رائے سے فیصلہ ہوا نیزCOVID-19کی گائیڈ لائن کے مطابق حکومت دہلی کی سرپرستی اور مددسے حجاج کرام کو ہر ممکن سہولیات مہیا کرانے پر بھی متفقہ طورپرفیصلہ ہوا۔ اس بابت دہلی اربن شیلٹر امپرومینٹ بورڈ کے افسران کے ساتھ میٹنگ کرنے کا فیصلہ کیا گیا۔

میٹنگ میں دہلی اسٹیٹ حج کمیٹی کے ممبران محمد ارشاد، ایڈوکیٹ، سید شاداب حسین رضوی اشرفی، ایگزیکٹو آفیسر جاوید عالم خان، ڈپٹی ایگزیکٹو آفیسر محسن علی موجود تھے۔ میٹنگ کا آغاز حافظ محمد طیب کی تلاوت کلام پاک سے ہوا۔