ڈاکٹر ہرش وردھن نے جی ٹی بی اسپتال میں’ڈرائی رن‘ کا جائزہ لیا، افواہوں سے بچنے کی تلقین

نئی دہلی: مرکزی صحت اور خاندانی بہبود کے وزیر ڈاکٹر ہرش وردھن نے آج جی ٹی بی اسپتال میں جاری کورونا ویکسین کے ’ڈرائی رن‘ کا جائزہ لیا۔ ڈاکٹر ہرش وردھن نے کہا کہ ملک میں کورونا ویکسین کے ویکسی نیشن کی مہم کی مکمل تیاری ہے۔ انہوں نے بتایا کہ یہ ’ڈرائی رن‘ ویکسینیشن شروع ہونے کی تاریخ سے پہلے کی تیاریوں کی جانچ کے لئے ترتیب دیا گیا ہے اور کسی بھی طرح کے سائڈ افیکٹ سے نمٹنے کے لئے بھی ہنگامی انتظام مکمل کر لئے گئے ہیں۔

انہوں نے اس موقع پر کہا کہ گزشتہ دنوں ملک کی چار ریاستوں میں ’ڈرائی رن‘ کا اہتمام کیا گیا تھا۔ ’ڈرائی رن‘ کے پہلے مرحلے سے موصولہ رپورٹ کی بنیاد پر پہلے کی ہدایتوں میں مزید ترمیم کی گئی ہے۔ اس موک ڈرل میں ویکسین دینے کے علاوہ ویکسی نیشن مہم سے جڑے سبھی کام کیے جا رہے ہیں۔

جی ٹی بی اسپتال کے بعد مرکزی وزیر صحت نے دریا گنج کے اربن پرائمری ہیلتھ سنٹر کا بھی دورہ کیا اور ’ڈرائی رن‘ کا جائزہ لیا۔ قابل ذکر ہے کہ آج ملک کے 116 اضلاع میں 259 مقامات پر کورونا ویکسین کا ’ڈرائی رن‘ کا انعقاد کیا جارہا ہے۔

کورونا کی ویکسی نیشن کے حوالہ سے میڈیا کی طرف سے پوچھے گئے سوالوں کے جواب میں ہرش وردھن نے کہا کہ میری سبھی سے اپیل ہے کہ وہ کسی طرح کی افواہ میں نہ آئیں اور کورونا کی ٹیکہ کاری میں تعاون کریں۔ پولیو کے دوران اس طرح کی افواہوں کی بھرمار تھی۔ بعد میں ملک بھر کے لوگوں نے ٹیکہ لگوایا تھا۔

انہوں نے کہا کہ حکومت ہند ملک کے لوگوں کو کووڈ 19 سے محفوظ رکھنا چاہتی ہے۔ ویکسین کی تیاری اور ٹیکہ کاری کا عمل اسی حفاظت کا حصہ ہے۔ لہذا ویکسین کے استعمال کے حوالہ سے پھیلائی جا رہی افواہوں پر توجہ نہ دیں اور اس مہم میں سبھی لوگ تعاون کریں۔