سب کے ٹیکے لگے نہیں ، بوسٹر ڈوز کی بات شروع

ایک جانب ابھی ملک کی بڑی آبادی کو کورونا کا ٹیکہ لگایا جانا باقی ہے اور اس کے لئے کوششیں بھی ہو رہی ہیں مگر اسی بیچ اس کی بھی آوازیں اٹھنے لگی ہیں کہ نئے ویرئنٹس سے حفاظت کے لئے بوسٹر ڈوز کی ضرورت پڑ سکتی ہے۔ ایمس کے ڈاریکٹر رندیپ سنگھ گلیریا نے کہا ہے کہ مستقبل قریب میں کورونا وائرس کے نئے ویرئنٹس کےپیش نظر بوسٹر ڈوز اپنانے کی ضرورت پڑ سکتی ہے۔خبروں کے مطابق اے این آئی سے گفتگو کرتے ہوئے ڈاکٹر گلیریا نے کہا ہے کہ انہیں ایسا محسوس ہو تا ہے کہ ٹیکوں کی بوسٹر ڈوز لینے کی ضرورت پڑ سکتی ہےکیونکہ وقت کے ساتھ قوت مدافعت کمزور پڑ سکتی ہے۔انہوں نے کہا کہ نئے ویرئنٹس سے حفاظت کے لئے بوسٹر ڈوز لینی پڑ سکتی ہے۔

ڈاکٹر گلیریا نے کہا ہے کہ بوسٹر ڈوز دوسری جنریشن کا ٹیکہ ہوگا اور دوسری جنریشن کے ٹیکے سے نئے ویرئنٹس سے حفاظت ہو سکتی ہے ۔ واضح رہے بوسٹر ڈوز کو لے کر پہلے ہی کئی ممالک میں بات چل رہی ہے اور بہت ممکن ہے کہ سال کےآخر تک بوسٹر ڈوز کی ضرورت پڑ ے۔ انہوں نے یہ بھی کہا کہ بوسٹر ڈوز پوری آبادی کی ٹیکہ کاری کے بعد ہی دی جا سکتی ہے۔

ڈاکٹر گلیریا نے بتایا کے آنے والے دنوں میں بچوں کے لئے بھی ٹیکہ دستیاب ہونے چاہئےاور اس کے لئے کئی کمپنیوں سے بات ہو رہی ہے۔