شکست سے دل شکستہ نہ ہوں، چندرابابو کا تلگودیشم لیڈران کو مشورہ

حیدرآباد: آندھراپردیش کے سابق وزیراعلی و تلگودیشم کے قومی صدر این چندرابابو نائیڈو نے پارٹی کارکنوں اور لیڈروں کو مشورہ دیا ہے کہ وہ پارٹی کی شکست سے مایوس نہ ہوں۔ انہوں نے ضلع گنٹور کے تلگودیشم سنٹرل آفس میں پارٹی کے بانی این ٹی راما راؤ کی جینتی تقاریب میں شرکت کی۔

اس موقع پر خطاب کرتے ہوئے انہوں نے پارٹی لیڈروں اور کارکنوں پر زور دیا کہ وہ این ٹی راما راؤ کے جذبہ کے ساتھ آگے بڑھیں کیونکہ این ٹی راماراؤ کو بھی انتخابات میں شکست ہوئی تھی۔ انہوں نے کہا کہ این ٹی راما راؤ ایک شخصیت نہیں تھے بلکہ وہ ایک شکتی تھے جو عوام کی خدمت کے جذبہ کے ساتھ سیاست میں آئے تھے۔ انہوں نے کہا کہ جب انتخابات میں این ٹی راما راؤ کو شکست ہوئی تو وہ کبھی دل شکن نہیں ہوئے۔

ان کے اسی جذبہ کے ساتھ ہم تمام کو کام کرنے کی ضرورت ہے۔ انہوں نے کہا کہ این ٹی راما راؤ فلاحی اسکیمات کا اختراع کرنے والے اہم لیڈر تھے۔ ہر تلگو فرد کو این ٹی راما راؤ پر فخر ہے۔ گزشتہ چار دنوں سے تلگودیشم کے مختلف لیڈران اور کارکنا ن چندرابابو سے ملاقات کرتے ہوئے اپنی حمایت کی یقین دہانی اور چندرابابو کے ساتھ برقرار رہنے کا وعدہ کر رہے ہیں۔

چندرابابو نے اعادہ کیا کہ تلگودیشم پارٹی ان کو ان کے خاندان سے زیادہ پیاری ہے۔ جس طرح قبل ازیں جدوجہد کی گئی تھی اسی طرح دوبارہ ہم جدوجہد کریں گے۔ انہوں نے کہا کہ انتخابی نتائج کا تجزیہ کیا جائے گا اور ان نتائج پر پارٹی کارکنوں کی رائے حاصل کی جائے گی۔ انہوں نے کہا کہ نئی حکومت کو کچھ وقت دیا جائے گا اور ہم ذمہ دار اپوزیشن پارٹی کے طور پر کام کریں گے۔

انہوں نے کہا کہ ہر کسی کو پارٹی کے استحکام کے لئے کام کرنے کی ضرورت ہے۔ چندرابابو نائیڈو نے پارٹی لیڈروں اورکارکنوں میں بھروسہ پیدا کرنے کی کوشش کی اور کہا کہ وہ ان کا خیال رکھنے کے لئے موجود ہیں۔