ڈی جی سی اے نے ’الکیمسٹ ایویشن‘ کا تربیتی پرواز لائسنس معطل کر دیا، جمشید پور حادثہ کے بعد ہوئی سخت کارروائی

حال ہی میں ’الکیمسٹ ایویشن پرائیویٹ لمیٹڈ‘ کا ایک تربیتی طیارہ حادثہ کا شکار ہو گیا تھا۔ اس حادثے میں طیارہ میں سوار ٹرینی پائلٹ اور پائلٹ کی جان چلی گئی تھی۔ اب اس ہوابازی کمپنی کے خلاف ڈی جی سی اے (ڈائریکٹوریٹ جنرل آف سول ایویشن) نے سخت کارروائی کی ہے۔ الکیمسٹ ایویشن کا تربیتی پرواز لائسنس رد کر دیا گیا ہے، اور یہ فیصلہ کمپنی کے خصوصی سیکورٹی آڈٹ کے بعد لیا گیا۔

ڈی جی سی اے کا کہنا ہے کہ آڈٹ کے دوران کئی سنگین خامیاں نظر آئیں، جس کے بعد ڈی جی سی اے نے کمپنی کا تربیتی پرواز لائسنس معطل کرنے کا فیصلہ لیا۔ ڈی جی سی اے کے مطابق کمپنی کو خامیوں کو دور کرنے اور اصول و ضوابط پر عمل کرنے سے متعلق لازمی اصلاح سے گزرنا ہوگا۔

ڈی جی سی اے نے جمعرات کو ایک نوٹیفکیشن میں بتایا کہ آڈٹ کے دوران الکیمسٹ ایویشن میں سنگین خامیاں پائی گئی ہیں اور ریگولیٹری التزمات پر بھی عمل نہیں کیا جا رہا تھا۔ قابل ذکر ہے کہ الکیمسٹ ایویشن جھارکھنڈ کے جمشید پور سوناری ہوائی اڈہ پر مقامی پرواز کا کام کرتی ہے۔ 20 اگست کو جھارکھنڈ میں سرائے کیلا-کھرساواں ضلع واقع سوناری ہوائی اڈہ سے پرواز بھرنے کے بعد الکیمسٹ ایویشن کا 2 سیٹر طیارہ لاپتہ ہو گیا تھا۔ بعد میں طیارہ کا ملبہ چانڈل پشتہ کے نہر سے برآمد ہوا تھا۔ این ڈی آر ایف اور بحریہ کی مدد سے طیارہ کے ملبہ کو نہر سے نکالا گیا تھا۔