آسمان سے آئی آفت سے اتراکھنڈ میں کہرام، کہیں پہاڑ بھربھرا کر گر پڑا تو کہیں جپسی ندی میں بہہ گئی

پہاڑی ریاست اتراکھنڈ میں آسمان سے مسلسل آفت آر ہی ہے۔ شدید بارش کی وجہ سے کئی جگہوں پر لینڈ سلائیڈ کا خوفناک منظر دیکھنے کو ملا ہے۔ وہیں ندیوں میں بھی زبردست طغیانی ہے۔ کہیں پر سڑکوں پر سیلاب کے بہتے پانی نے لوگوں کا راستہ روک دیا ہے تو کہیں کہیں پر یہ جان لیوا بھی ثابت ہو رہی ہے۔

کاربیٹ سٹی کے طور پر مشہور رام نگر میں ایک جپسی کے ندی میں بہہ جانے کی خبر ہے۔ جبکہ ٹہری، چمپاوت، پتھوراگڑھ اور باگیشور میں لینڈ سلائیڈ کی اطلاعات ملی ہیں۔ الموڑا میں شدید بارش کے بعد ہائی وے کو بلاک کر دیا گیا ہے۔ رشی کیش میں بھی گنگا ندی کی آبی سطح میں اضافہ ہو گیا ہے اور باگیشدور میں گومتی اور سریو ندی میں طغیانی ہے۔

پتھورا گڑھ میں کثیر مقدار میں بارش کے بعد دھارچولا تواگھاٹ قومی شاہراہ میں چیتل کوٹ کے پاس بڑا لینڈ سلائیڈ ہوا جس میں پہاڑی کا ایک بڑا حصہ بھربھرا کر نیچے گر گیا۔ اس زبردست لینڈ سلائیڈ کا ویڈیو بھی کافی وائرل ہو رہا ہے۔ لینڈ سلائیڈ کے بعد سڑک آمد ورفت کے لیے پوری طرح سے بند کر دی گئی ہے جس کے سبب لوگوں کی پریشانیوں میں مزید اضافہ ہو گیا ہے۔ یہاں پر قومی شاہراہ سمیت کُل 30 سڑکیں بند پڑی ہیں۔

اتراکھنڈ میں آسمان سے آئی آفت کے کئی خوفناک منظر کیمرے میں قید ہو گئے ہیں۔ رام نگر سے آئے ایک ویڈیو میں دیکھا جاسکتا ہے کہ سڑک پر پوری رفتار سے پانی کی دھارا بہہ رہی ہے۔ آنے جانے والوں کے راستے میں یہ تیز بہاؤ رکاوٹ بن گئی ہے۔ اس دوران جب سڑک کنارے کھڑی ایک جپسی اس بہاؤ کی لپیٹ میں آئی تو بہتی چلی گئی۔ جپسی پر سوار لوگوں نے گاڑی سے کود کر کسی طرح اپنی جان بچائی۔

پولیس لگاتار لوگوں کو احتیاط برتنے کی ہدایت دیتے ہوئے الرٹ کر رہی ہے۔ بارش رکنے کے بعد بھی کچھ برساتی نالوں کا پانی لگاتار شاہراہوں پر بہہ رہا ہے۔ کوئی بھی ناخوشگوار واقعہ نہ ہو اس کے لیے ان نالوں پر پولیس کو تعینات کر دیا گیا ہے۔ حالانکہ ابھی بھی کچھ گاڑی ڈرائیور اپنی جان جوکھم میں ڈال کر سفر کر رہے ہیں۔ واضح ہو کہ رام نگر اور آس پاس کے علاقوں میں زیادہ تر برساتی نالے ہائی وے کے اوپر سے بہتے ہیں جس کے سبب اس پریشانی کا سامنا کرنا پڑتا ہے۔

ٹہری ضلع میں گزشتہ تین دنوں سے شدید بارش ہو رہی ہے۔ ٹہری سے گزرنے والی بھلنگنا، بال گنگا، نیل چامی اور بھاگیرتھی ندی سمیت تمام نالے طغیانی پر ہیں۔ جگہ جگہ سے لینڈ سلائیڈ کی تصویریں سامنے آ رہی ہیں۔ گھنسالی میں سڑک پر ملبہ آ گیا ہے۔ درجنوں گاؤں کا ضلع ہیڈ کوارٹر سمیت اہم بازاروں سے رابطہ منقطع ہو چکا ہے۔