یوپی انتخاب: پسماندہ طبقات سے بی جے پی کی نفرت ایک بار پھر بے نقاب!

اتر پردیش اسمبلی انتخابات کے لیے بی جے پی نے آج اپنا انتخابی منشور جاری کر دیا ہے۔ بی جے پی نے اپنے منشور کو ’لوک کلیان سنکلپ پتر 2022‘ نام دیا ہے۔ نام سے ظاہر ہے کہ اس میں بی جے پی نے لوگوں کی فلاح سے متعلق عزم کا اظہار کیا ہے۔ لیکن اس سنکلپ پتر میں ایک ایسی چیز دیکھنے کو ملی ہے جو پارٹی کے پسماندہ طبقات سے متعلق اپنی نفرت کو ظاہر کرتی ہے۔ یا پھر یوں کہیں کہ پسماندہ طبقات کو ساتھ لے کر چلنے کے وعدے پر سوالیہ نشان کھڑے کرتی ہے۔

دراصل بی جے پی کے سابق قومی صدر امت شاہ نے وزیر اعلیٰ یوگی آدتیہ ناتھ کے ساتھ بی جے پی کا جو منشور جاری کیا ہے اس کے کور پر ریاست کے نائب وزیر اعلیٰ کیشو پرساد موریہ کی تصویر موجود نہیں ہے۔ اس عمل نے پسماندہ طبقات سے متعلق بی جے پی کی نیت کو بے نقاب کر دیا ہے۔ یعنی 2017 میں جن پسماندہ طبقات سے جھوٹے وعدے کر حکومت اقتدار حاصل کرنے میں کامیاب رہی، اب اسی پسماندہ طبقہ سے آنے والے کیشو پرساد موریہ کی تصویر بی جے پی نے انتخابی منشور سے غائب کر دی۔ سال 2017 کی بات کریں تو اس وقت کیشو پرساد موریہ کی تصویر انتخابی منشور کے کور پر موجود تھی۔ فی الحال بی جے پی کی طرف سے اس سلسلے میں کوئی بیان سامنے نہیں آیا ہے۔