دہلی کے ویلکم علاقہ میں فرقہ وارانہ کشیدگی، پولیس نے 20 لوگوں کو حراست میں لیا

نئی دہلی: دہلی کے دو فرقوں کے درمیان ایک مرتبہ پھر جھڑپ ہونے کی اطلاع موصول ہوئی ہے۔ اے بی پی نیوز کے مطابق یہ واقعہ بدھ کو دیر رات گئے اس وقت پیش آیا جب دو فرقوں کے درمیان پہلے ہاتھاپائی ہوئی اور اس کے بعد پتھربازی شروع ہو گئی۔ واقعہ کی اطلاع پر علاقہ میں بھاری پولیس فورس تعینات کی گئی ہے۔

رپورٹ کے مطابق، شمال مشرقی دہلی کے ڈی سی پی نے کہا، "گذشتہ رات تقریباً 9.50 بجے ویلکم علاقہ میں فوٹو چوک کے قریب دو فرقوں کے لوگوں کے درمیان جھگڑے کے سلسلے میں ایک پی سی آر کال موصول ہوئی۔ اطلاع ملنے پر پولیس نے کارروائی کی۔ ٹیم فوری طور پر موقع پر پہنچی۔ اس کے ساتھ ساتھ فورس بھی تعینات کر دی گئی۔

انہوں نے مزید کہا ’’ابتدائی تفتیش میں معلوم ہوا کہ ویلکم علاقہ کے ایکس اینڈ وائی بلاک کے پارک میں کھیلنے والے بچوں کے درمیان لڑائی ہوئی تھی۔ جس کی وجہ سے دونوں فرقوں میں ہاتھا پائی ہوئی۔ فرقہ وارانہ کشیدگی کے پیش نظر کچھ لوگوں نے پولیس کو اطلاع دی، جس کے بعد پولیس حرکت میں آئی اور علاقے میں بھاری فورس تعینات کر دی گئی۔‘‘

ڈی سی پی نے مزید کہا کہ اس واقعہ میں ملوث کئی شرپسندوں کو حراست میں لیا گیا ہے۔ 20 افراد کو پکڑ لیا گیا ہے اور کچھ کی تلاش جاری ہے۔ اس معاملے میں آئی پی سی کے تحت کارروائی کی جا رہی ہے اور 108 سی آر پی سی کے تحت بھی مقدمہ درج کیا گیا ہے۔ ان کے مطابق اس وقت صورتحال مکمل طور پر قابو میں ہے۔ شہریوں کی بھائی چارہ کمیٹی کے اراکین کو قصورواروں کی شناخت میں مدد کے لیے شامل کیا گیا ہے۔