دہلی: سرکاری دفاتر کے اوقات میں تبدیلی کا فیصلہ، بڑھتی فضائی آلودگی کے سبب آتشی حکومت نے اٹھایا قدم

دہلی میں بڑھتی فضائی آلودگی کے پیش نظر دہلی کی وزیر اعلیٰ آتشی نے جمعہ کے روز راجدھانی میں سرکاری دفاتر کے لیے نئے اوقات کا اعلان کر دیا ہے۔ اس قدم کے ذریعہ گاڑیوں سے ہونے والی آلودگی پر قابو پانے کی کوشش ہو رہی ہے۔ وزیر اعلیٰ نے سوشل میڈیا پلیٹ فارم ’ایکس‘ پر اس سلسلے میں جانکاری دیتے ہوئے کہا کہ ٹرافک کی بھیڑ اور اس سے متعلق آلودگی کو کم کرنے کے لیے دہلی میں سرکاری دفاتر کے وقت میں تبدیلی کی جائے گی۔ ٹریفک کی بھیڑ اور اس سے متعلق آلودگی کو کم کرنے کے لیے دہلی بھر کے سرکاری دفاتر میں الگ الگ وقت پر کام ہوگا۔

وزیر اعلیٰ نے اپنے سوشل میڈیا پوسٹ میں جانکاری دی ہے کہ دہلی میونسپل کارپوریشن دفاتر کی ٹائمنگ صبح 8.30 بجے سے شام 5 بجے تک ہوگی، جبکہ مرکزی حکومت کے دفاتر کی ٹائمنگ صبح 9 بجے سے شام 5.30 بجے تک اور دہلی حکومت کے دفاتر کی ٹائمنگ صبح 10 بجے سے شام 6.30 بجے تک ہوگی۔

قابل ذکر ہے کہ دہلی میں لگاتار فضائی آلودگی میں اضافہ ہو رہا ہے۔ اس بڑھتی آلودگی کے پیش نظر جمعہ کی صبح 8 بجے سے راجدھانی میں گریپ کا اسٹیج 3 نافذ کر دیا گیا ہے۔ فضائی آلودگی پر لگام لگانے کے لیے کئی اصول بھی بنائے گئے ہیں۔ دہلی حکومت نے فیصلہ کیا ہے کہ راجدھانی خطہ دہلی میں 106 اضافی کلسٹر بسیں چلائی جائیں گی۔ اس کے ساتھ ہی زیادہ میٹرو ٹرینیں بھی چلائی جائیں گی۔ میٹرو روزانہ کے مقابلے تقریباً 60 اضافی چکر لگائے گی۔