دہلی: نوتعینات ضلع چیئرمینس نے عمران پرتاپ گڑھی سے کی ملاقات

نئی دہلی: جوں جوں دہلی اسمبلی الیکشن 2025 قریب آتا جا رہے دہلی پردیش کانگریس کمیٹی ہر محاذ پر سرگرم نظر آ رہی ہے۔ گزشتہ روز آل انڈیا کانگریس کمیٹی اقلیتی شعبہ کی جانب سے ایک لیٹر جاری کیا گیا جس میں کانگریس کے راجیہ سبھا رکن اور قومی اقلیتی شعبہ کے چیئرمین عمران پرتاپ گڑھی، انچارج شاہنواز شیخ نے دہلی کے 13 نو تعینات ضلع چیئرمینس کے ناموں کو منظوری دی ہے۔

کانگریس کی سرگرمیوں سے اندازہ لگایا جا رہا ہے کہ پارٹی ماضی کی غلطیوں کو دوبارہ دہرانے کے موڈ میں نہیں ہے وہ بڑی چھان پھٹک کے بعد ہی ایسے لوگوں کو ذمہ داری اور عہدہ دے رہی ہے جو زمینی سطح پر کانگریس کے کارواں کو نہ صرف آگے بڑھائیں بلکہ الیکشن میں کانگریس کو مزید مضبوط کر سکیں۔

13 نو تعینات ضلع چیئر مینس میں ضلع قرول باغ سے راجیندر سنگھ، ضلع کیراڑی سے رضوان پرویز، ضلع نجف گڑھ سے سید قمر الدین، ضلع کراول نگر سے محمد توقیر، ضلع بدرپور سے مشرف علی، ضلع پٹپڑ گنج سے مسعود عالم، ضلع نئی دہلی سے محمد حامد، ضلع بابر پور سے محمد مراد، ضلع تلک نگر سے مہیندر سنگھ، ضلع آدرش نگر سے سالم علوی، ضلع کرشنا نگر سے محمد عالم، ضلع مہرولی سے فیروز غازی، ضلع چاندنی چوک سے محمد فرقان عرف بابو کو چیئرمین کی ذمہ داری ملی ہے۔

نئی ذمہ داری ملنے پر دہلی اقلیتی شعبہ کے نوتعینات ضلع چیئرمینس نے رکن پارلیمنٹ عمران پرتاپ گڑھی سے ان کی رہائش گاہ پر ملاقات کی اور اپنے اپنے اضلاع میں کانگریس پارٹی کو مزید مضبوط کرنے کی حکمت عملی پر تفصیلی تبادلہ خیال کیا۔ اس موقع پر دہلی اقلیتی شعبہ کے چیئرمین عبدالوحید قریشی، دہلی اقلیتی شعبہ کے انچارج شاہنواز شیخ اور نو منتخب ضلع چیئرمینس نے عمران پرتاپ گڑھی کا شال پہنا کر زور دار استقبال کیا۔

عمران پرتاپ گڑھی نے چیئرمینس سے مخاطب ہوتے ہوئے کہا کہ کانگریس پارٹی ملک کی واحد سیاسی جماعت ہے جو ملک کے تمام طبقات اور سبھی مذاہب کے لوگوں کو ساتھ لے کر چلتی ہے اور ان کے مفاد میں کام کرتی آئی ہے۔ آج ہم سب کے لیڈر راہل گاندھی جی نے نفرت بھرے دور میں بھارت جوڑو یاترا کے ذریعہ محبت کا جو پیغام دیا ہے اس سے ملک کی برسوں پرانی تہذیب، جسے ہم گنگا جمنی تہذیب کے نام سے جانتے ہیں، وہ مزید مضبوط ہوئی ہے۔

عمران پرتاپ گڑھی نے اپنی بات کو آگے بڑھاتے ہوئے کہا کہ مجھے پوری امید ہے کہ جن کو ضلع کی ذمہ داری ملی ہے وہ اپنے اپنے اضلاع میں کانگریس پارٹی کے کارواں کو آگےبڑھانے کا کام کریں گے اور انتخابات میں پوری ذمہ داری کے ساتھ اپنا فرض ادا کریں گے۔ عمران پرتاپ گڑھی نے یہ بھی کہا کہ عبدالواحد قریشی نے جس محنت اور لگن کے ساتھ اقلیتوں کو کانگریس پارٹی سے جوڑنے کا کام کیا ہے وہ قابل تعریف ہے۔ ہمیں ایک دوسرے کا ساتھ دیتے ہوئے کانگریس پارٹی کے خیالات کو عام لوگوں تک پہنچانا ہے۔

دہلی اسمبلی انتخاب 2025 سے متعلق بات کرتے ہوئے انچارج شاہنواز شیخ اور چیئرمین عبدالواحد قریشی نے مشترکہ طور پر کہا کہ دہلی کانگریس کا اقلیتی شعبہ پوری طاقت کے ساتھ کام کر رہا ہے۔ نو منتخب ضلع چیئرمین ابھی سے اپنی ذمہ داریاں نبھانے کے لیے نہ صرف تیار ہیں بلکہ بیتاب ہیں۔ واحد قریشی نے کہا کہ مجھے پورا بھروسہ ہے کہ آئندہ دہلی اسمبلی انتخاب میں ضلع چیئرمینس کی محنت ضرور رنگ لائے گی۔

قابل غور ہے کہ جب سے دہلی پردیش کانگریس کمیٹی کے صدر دیوندر یادو نے کمان سنبھالی ہے، ہر ماہ کی 2 تاریخ کو بلاک میٹنگ اور 10 تاریخ کو ضلع کی میٹنگ منعقد کرنا لازمی ہے اور اس بات پر غور کرنا بھی ضروری ہے کہ لیڈران و کارکنان اپنی کارگردگی بھی بتائیں۔ تاہم کانگریس پارٹی ان کارکنان و لیڈران پر بھی نظر رکھ رہی ہے جو سرگرم نہیں ہیں۔