دہلی کی وزیر آتشی 15 اگست کو کیجریوال کی جگہ پرچم نہیں لہرا سکیں گی، تجویز مسترد کر دی گئی

نئی دہلی: دہلی کی وزیر آتشی راجدھانی میں یوم آزادی کے موقع پر وزیر اعلی اروند کیجریوال کی جگہ پرچم نہیں لہرا سکیں گی۔ کیجریوال، جو اس وقت جیل میں قید ہیں، نے خواہش ظاہر کی تھی کہ 15 اگست کو چھترسال اسٹیڈیم میں منعقدہ پروگرام کے دوران ان کی جگہ پر آتشی پرچم لہرائیں لیکن اس تجویز کو مسترد کر دیا گیا ہے۔

دہلی حکومت کے جنرل ایڈمنسٹریشن ڈیپارٹمنٹ (جی اے ڈی) نے کیجریوال کی اس تجویز کو مسترد کر دیا ہے۔ اس کے بعد اب یہ واضح ہو گیا ہے کہ آتشی یوم آزادی کے موقع پر دہلی میں ہونے والے پروگرام میں قومی پرچم نہیں لہرا سکیں گی۔ اس تجویز کو مسترد کرتے ہوئے قواعد کا حوالہ دیا گیا ہے۔

دہلی کے وزیر اعلی اروند کیجریوال جو شراب گھوٹالہ کیس میں جیل میں ہیں، نے 15 اگست کو پرچم لہرانے کے سلسلے میں لیفٹیننٹ گورنر کو خط لکھا تھا۔ خط میں کیجریوال نے بتایا تھا کہ 15 اگست کو یوم آزادی کے موقع پر وزیر آتشی سنگھ دہلی میں پرچم لہرائیں گی۔

دہلی میں ہر سال یوم آزادی کے موقع پر دہلی حکومت چھترسال اسٹیڈیم میں ایک پروگرام منعقد کرتی ہے، جس میں وزیر اعلیٰ پرچم کشائی کرتے ہیں۔ لیکن اس بار وزیر اعلیٰ اروند کیجریوال جیل میں ہیں اس لیے انہوں نے اپنی کابینہ وزیر آتشی کو پرچم لہرانے کا اختیار دیا تھا۔

حالانکہ منیش سسودیا کے جیل سے باہر آنے کے بعد یہ قیاس کیا جا رہا تھا کہ منیش سسودیا اب 15 اگست کو پرچم لہرائیں گے جبکہ اروند کیجریوال نے آتشی کا نام پہلے ہی لے لیا تھا۔

کیجریوال اس وقت دہلی کی تہاڑ جیل میں بند ہیں۔ ان پر دہلی ایکسائز پالیسی گھوٹالے سے متعلق بدعنوانی اور منی لانڈرنگ کا الزام ہے۔ کیجریوال کو 5 اگست کو ہی دہلی ہائی کورٹ سے جھٹکا لگا تھا، جب گرفتاری کو چیلنج کرنے والی ان کی درخواست ہائی کورٹ نے مسترد کر دی تھی۔