دہلی جرنلسٹ ایسوسی ایشن کا انتخاب، ارشد فریدی بلا مقابلہ خزانچی منتخب

نئی دہلی: صحافیوں کی سرکردہ تنظیم، دہلی جرنلسٹ ایسوسی ایشن (ڈی جے اے) کے دو سالہ انتخابات (2019-2021) کے نتائج کا آج اعلان کر دیا گیا۔ روزنامہ میرا وطن کے ایڈیٹر ارشد فریدی کو بلا مقابلہ ڈی جی اے کا خزانچی منتخب کر لیا گیا ہے۔

تنظیم کی تاریخ میں پہلی بار اردو کے کسی صحافی اور ایک مسلمان کو اس تنظیم کا خزانچی منتخب کیا گیا ہے۔ اس انتخاب میں لوک سبھا ٹی وی کے انوراگ پنیٹھا کو بلا مقابلہ صدر اور یونیوارتا کے سچن بدھولیا کو جنرل سکریٹری منتخب کیا گیا ہے۔

ڈی جی اے کا خزانچی منتخب ہونے پر ارشد فریدی نے تنظیم کے تمام ممبران کا شکریہ ادا کیا اور کہا کہ وہ آئندہ دو سالوں تک اس عہدہ پر برقرار رہتے ہوئے صحافیوں کے تمام مسائل کو حل کرانے کے ساتھ ساتھ ان کی فلاح و بہبود کے لیے ہمہ وقت کوشاں رہیں گے۔

الیکشن آفیسر گیانیندر برتیہ اورجوائنٹ انتخابی افسر آشیش کمار ’انشو‘ نے آج یہاں ایگزیکٹو کے نئے عہدیداروں اور ممبروں کے انتخاب کا اعلان کیا۔ دہلی جرنلسٹ ایسوسی ایشن کی ایگزیکٹو کمیٹی میں آلوک گوسوامی (پنچ جنیہ)، سنجیو سنہا (پروکتا ڈاٹ کام)، راکیش شکلا (نو بھارت) اور اتول گنگوار (بول بنداس ڈاٹ کام) نائب صدر منتخب ہوئے ہیں، جب کہ آدتیہ بھاردواج (پنچ جنیہ)، راج کمل چودھری (زی نیوز) اور منجیت نیگی (آج تک) سیکرٹری منتخب ہوئے ہیں، جبکہ روزنامہ میرا وطن کے ارشد فریدی خزانچی منتخب کئے گئے ہیں۔